Հինը քանդելու և նորը կառուցելու որոշումներ կայացնելու հարցում փոփոխություններ են պետք: Այսօր լրագրողների հետ հանդիպմանն ասաց ճարտարապետ Հրաչյա Պողոսյանը՝ անդրադառնալով Խորենացի 13 հասցեում գտնվող ԿԳՆ նախկին շենքի ապամոնտաժմանը:
«Երկար տարիներ գոյություն ունեցող կառուցվածքը չի աշխատում: Արտասահմանյան փորձը ցույց է տալիս, որ շատ քաղաքներում գլխավոր ճարտարապետ հասկացություն ընդհանրապես գոյություն չունի: Պետք է այնպես անել, որ քաղաքին վերաբերող կարևոր խնդիրները մեկ մարդուց, նրա անձնական կարծիքից կամ ճաշակից կախված չլինեն»,- ընդգծեց ճարտարապետը:
Նրա խոսքով՝ շենքը քանդելու և փոխարենը նոր բան կառուցելու նախագիծ Ճարտարապետների միության որակավորման հանձնաժողով չի ներկայացվել, հետևաբար՝ արտոնագիր չի ստացել:
Ըստ այդմ՝ Հրաչյա Պողոսյանը կարծում է, որ նման նախագիծ գոյություն չունի: «Իհարկե՝ արժեք էր, չէր կարելի քանդել: Բայց ոչ մեկի մտքով չի անցնում, որ նման խնդիրների դեպքում հանրությունը, ինչպես նաև Ճարտարապետների միությունն իմանում է այն ժամանակ, երբ քանդման գործողությունն արդեն իրականացվում է: Ես, օրինակ, ֆեյսբուքից եմ տեղեկացել այդ մասին»,- նշեց Հրաչյա Պողոսյանը։
Անդրադառնալով նաև նախկին «Սևան» հյուրանոցի շենքի քանդմանը՝ ճարտարապետը նշեց, որ հյուրանոցի շենքին վերաբերող նախագիծը ևս պետք է լայնորեն քննարկվի:
«Ես ենթադրում եմ, որ լոնդոնաբնակ բարերար Վաչե Մանուկյանը, որը գնել էր «Սևան» հյուրանոցի շենքը, գնել է նաև Խորենացի 13 հասցեում գտնվող շենքը»,- ասաց Հրաչյա Պողոսյանը:
Երևանի նախկին գլխավոր նկարիչ Հաղթանակ Շահումյանի կարծիքով էլ՝ քաղաքում յուրաքանչյուր նոր բան պետք է հիմնված լինի գլխավոր հատակագծի վրա, ոչ թե որևէ մեկի քմահաճույքի:
«Ցավոք՝ օրենքները մեզ մոտ ընտրովի են օգտագործվում: Կորցնում ենք, հետո՝ փոշմանում: Եթե մենք շարունակենք անփույթ լինել, Երևանն անդեմ մի բան կդառնա։ Պետք է եղածի վրա կառուցենք։ Եղածը զարգացնենք և պահպանենք»,- նշեց Հաղթանակ Շահումյանը:
Նկարչին զարմացնում է, որ Հանրային խորհուրդն ու քաղաքապետարանն այս օրերին լռում են: Ըստ նրա՝ շենքն ի սկզբանե եղել է հուշարձանների ցանկում, բայց հետո հանվել է:
Մանրամասները՝ տեսանյութում:
Նելլի Մելքոնյան
