29.06.2026 | 21:27
Պուտինի սուրպերզբոսանավը 2022թ․ ի վեր առաջին անգամ հայտնվել է ռադարների էկրանին․ այն նկատել են Դանիայի ափերի մոտ
Լոնդոնում մեկնարկել են Ուկրաինայի, Մեծ Բրիտանիայի, Ֆրանսիայի և Գերմանիայի առաջնորդների բանակցությունները
Քաղաքականություն
08.12.2025 | 17:45
Ուկրաինայի նախագահ Վլադիմիր Զելենսկին, Մեծ Բրիտանիայի վարչապետ Քիր Սթարմերը, Ֆրանսիայի նախագահ Էմանուել Մակրոնը և Գերմանիայի կանցլեր Ֆրիդրիխ Մերցը հավաքվել են Բրիտանիայի վարչապետի նստավայրում՝ Լոնդոնի Դաունինգ սթրիթ 10 հասցեում, գրում է BBC-ի ռուսական ծառայությունը։
Չորս առաջնորդները չեն պատասխանել նստավայրի դիմաց սպասող լրագրողների հարցերին։
Նրանց հանդիպման հիմնական թեման Ֆլորիդայում ուկրաինական պատվիրակության կողմից ԱՄՆ նախագահ Դոնալդ Թրամփի ներկայացուցիչների հետ Ուկրաինայում պատերազմը դադարեցնելու պայմանների վերաբերյալ եռօրյա բանակցությունների արդյունքներն են։
Զելենսկին ավելի վաղ հայտարարել էր, որ Դոնբասի հիմնական հարցի շուրջ որևէ փոխզիջում ձեռք չի բերվել, և Թրամփը հայտարարել էր, որ «հիասթափված» է դրանից։
Հանդիպումից առաջ Մեծ Բրիտանիայի վարչապետ Քիր Սթարմերը հայտարարել է, որ Ուկրաինայի համար խաղաղության համաձայնագիրը պետք է պարունակի «անվտանգության ամուր երաշխիքներ», որպեսզի Մոսկվան պահպանի հրադադարի ցանկացած համաձայնագիր։ Սթարմերը նաև գովաբանել է ԱՄՆ նախագահ Դոնալդ Թրամփի գործողությունները։ Նա ասել է, որ Թրամփը մի քանի շաբաթվա ընթացքում խաղաղության բանակցություններն առաջ է մղել «ավելի, քան մենք արել ենք չորս տարվա ընթացքում»։
Խաղաղության բանակցությունները դժվար են, ասել է Սթարմերը, «բայց ես կարծում եմ, որ մենք առաջընթաց ենք գրանցում»։
Թարգմանությունը՝ Էմմա Չոբանյանի
