03.05.2024 | 17:00
ՌԴ-ն մայիսի վերջին կամ հունիսի սկիզբին նոր հարձակման է պատրաստվում Ուկրաինայի հյուսիս-արևելքում
Դեռ 10 տարի առաջ ասել եմ, հիմա էլ պնդում եմ՝ կոնկրետ ով է հրաման տվել, և ով սպանել որդուս. Սարգիս Քլոյան. ՏԵՍԱՆՅՈՒԹ
Քաղաքականություն
07.02.2019 | 16:30
Factor.am-ի հարցազրույցը Մարտի 1-ի արյունալի դեպքերի ժամանակ զոհված Գոռ Քլոյանի հոր՝ Սարգիս Քլոյանի հետ
– Պարո՛ն Քլոյան, Վերաքննիչ դատարանը մերժեց Ռոբերտ Քոչարյանի պաշտպանների բողոքը, նա ևս երկու ամիս կմնա կալանքի տակ: Եթե ոչինչ չփոխվի, ապա նա Մարտի 1-ը կդիմավորի կալանավայրում։ Ի՞նչ կասեք:
– Ես կարծում եմ, որ դա քննիչների գործն է, իրավաբանական գործընթաց է, որը ես չեմ կարող մեկնաբանել: Ես կարող եմ ասել, որ Ռոբերտ Քոչարյանը՝ համար առաջին մեղավորը, պետք է պատասխանատվություն կրի օրենքի ամբողջ խստությամբ:
– Այս գործով հարցաքննվել է նաև Սերժ Սարգսյանը, նա վկայի կարգավիճակ ունի: Սա Ձեզ բավարարո՞ւմ է:
– Ո՛չ, իհարկե՝ չի բավարարում: Սա երկար գործընթաց է, ժամանակ է անհրաժեշտ: Կգա ժամանակ, և նա էլ օրենքի առաջ պատասխանատվություն կկրի:
– Մինչև ո՞ւր պիտի հասնի մեղադրյալների շրջանակը, ըստ Ձեզ՝ ովքե՞ր պիտի պատասխանատվության ենթարկվեն այս գործով:
– Համար առաջինն արդեն ենթարկվում է՝ Ռոբերտ Քոչարյանը, Սերժ Սարգսյանը, այն ժամանակվա գլխավոր դատախազը, ԶՈՒ ղեկավարը, ոստիկանապետը, շտաբի պետերը, նրանց տեղակալները և, իհարկե, ձգան քաշողները: Մարտի 1-ին շտաբի նիստ է տեղի ունեցել, և պիտի պատասխանատվության կանչվեն բոլորը, ովքեր դրան մասնակցել են՝ Շիրակ Թորոսյան, Հովիկ Աբրահամյան, Արմեն Գևորգյան և այլն:
– Շատերը պնդում են, որ Մարտի 1-ի գործը չի կարող լինել բացահայտված, եթե տասը զոհերի սպանությունների հեղինակները բացահայտված չեն:
– Ես դրա հետ համաձայն չեմ, որովհետև մենք վերջերս եղել ենք ՀՔԾ-ում, ես այնտեղ այդ հարցը տվել եմ, թե ինչո՞ւ նրանց չեք բացահայտում: Նրանք ասացին, որ սա երկար գործընթաց է, մենք զրոյից ենք սկսել ամբողջ գործընթացը: Մենք չենք հավատում նախկին իշխանությանը, թե նա ինչ քննություն է վարել:
– Ասացիք՝ քննիչները Ձեզ հավատացրել են, որ իրենք գործը զրոյից են սկսել: 10 տարի շարունակ նախաքննություն էր իրականացվում, ինչո՞ւ այդ գործն այդպես էլ չբացահայտվեց:
– Սերժ Սարգսյանն ու Աղվան Հովսեփյանը ծածկադմփոց են արել, մեզ ասել են՝ ընթանում է նախաքննություն, բայց ոչինչ չեն արել: Մեր գործերի վրա թոզը դրած, դարակում պահած էր:Ես այդ ժամանակ գնացել եմ ՀՔԾ, ասել եմ, թե ով է իմ որդուն սպանել, ով է հրաման տվել:
-Ո՞ւմ անուններն եք տվել:
– Անմիջապես հրաման տվողի, և անմիջապես սպանողի: Հրաման տվողը եղել է Գլխավոր շտաբի պետի տեղակալը, իսկ անմիջապես կրակողի անունը չեմ տա, քանի որ նախաքննություն է ընթանում: Ես նախկինում էլ գրավոր գրել եմ, թե ովքեր են սպանել, ասել եմ՝ եթե իմ ասածները չեն համապատասխանում իրականությանը, սուտ մատնության համար ինձ պատասխանատվության ենթարկեք:
– Պարո՛ն Քլոյան, Երևանում Մարտի 1-ի տասը զոհերի հիշատակին նվիրված հուշարձան կտեղադրվի: Լենա Նազարյանն այս հարցով քաղաքապետարան է դիմել: Ինչպե՞ս եք վերաբերվում:
– Դա մեր պահանջն էր: Հուշարձանն ունի խորհրդանիշ. դա ցույց կտա Հայաստանի իշխանություններին, որ իշխանության գալու համար արյուն պետք չէ թափել: Հուշարձանը կկառուցվի Երևանի քաղաքապետարանի տարածքում, մի երեք ամսից պատրաստ կլինի և կդառնա մեզ համար սրբավայր:
Հարցազրույցն ամբողջությամբ՝ տեսանյութում
Լիլիթ Շաբոյան
