Մեր թիմը հայտնի է բազմակարծությամբ. ՔՊ-ական պատգամավոր․ ՏԵՍԱՆՅՈՒԹ

Քաղաքական թիմում բազմակարծություն կա, և ԱԽ նախկին քարտուղար Արմեն Գրիգորյանի՝ Եվրամիությանն անդամակցելու հեռանկարի վերաբերյալ արտահայտած տեսակետը խնդրահարույց չէ։ Այս մասին Factor TV-ի հարցին ի պատասխան հայտարարեց «Քաղաքացիական պայմանագիր» խմբակցության պատգամավոր Հասմիկ Հակոբյանը՝ անդրադառնալով Գրիգորյանի հոդվածին։

Հարցին՝ արդյոք թիմում եղել են մարդիկ, որոնք չեն կիսում ԵՄ-ին անդամակցելու՝ Հայաստանի հնարավորությունը, Հակոբյանը պատասխանեց, որ ՔՊ-ում տարբեր տեսակետների արտահայտումը բնական է, և որևէ դիրքորոշում վերևից չի թելադրվում։

«Մեր թիմը հայտնի է նաև բազմակարծությամբ և տարբեր տեսակետների արտահայտմամբ։ Այսինքն՝ այնպես չէ, որ ինչ-որ տեսակետ է վերևից թելադրվում, և բոլորը պետք է կրկնեն նույն բանը: Եվ բնականաբար, նա իր տեսակետն է հայտնել, իր պատկերացումն է բարձրաձայնել, քննարկման է հրավիրել նաև մարդկանց՝ էդ տեսակետը կիսելու կամ քննադատելու համար: Նորմալ է»,- ասաց Հակոբյանը։

Մեր հարցին՝ հնարավո՞ր է՝ հենց այդ դիրքորոշումն է եղել Արմեն Գրիգորյանի պաշտոնից հեռանալու պատճառը, պատգամավորը պատասխանեց, որ այդ հարցի հասցեատերն ինքը չէ, այն վարչապետի տիրույթում է, սակայն, իր կարծիքով, Գրիգորյանի տեսակետը հեռացման պատճառ չի եղել։ Հակոբյանը նշեց, որ Գրիգորյանի հոդվածում խնդրահարույց որևէ բան չի տեսնում, և ՔՊ-ում նման քննարկումներ նախկինում էլ են եղել։

«Եվրամիության վերաբերյալ մենք օրենք ենք ընդունել, տարբեր քննարկումներ ենք ունեցել, դա տեսակետ է, որը իրավունք ունի գոյանալու»,- ընդգծեց նա։

Հարցին, թե թիմում քանի՞ մարդ է կիսում Գրիգորյանի արտահայտած դիրքորոշումը, Հակոբյանը նշեց, որ այդ տեսակետը նորություն չէ, և ինքը չի հասկանում դրա շուրջ առաջացած զարմանքը։

«Եթե մեծամասնություն ունենար այդ կարծիքը, մենք էդ ուղիով կգնայինք: Մենք նախանշել ենք էն ուղին, որը նախանշել ենք, և տեսնում եք, որ շատ արագ ընթացքով գնում ենք մեր նպատակի հետևից»,- ասաց իշխանական պատգամավորը։

Նա նաև ընդգծեց, որ Գրիգորյանը շարունակում է մնալ իրենց կուսակցական գործընկերը, և չի կարելի նրան դիտարկել որպես ընդդիմադիր գործիչ։

«Մեր կուսակցական գործընկերն է, մեր լավ գործընկերն է, նաև այսօրվա խաղաղության գործընթացի գործիչ է, անդամ է, և չենք կարող էլի մենք նման բան ասել»,- նշել է Հասմիկ Հակոբյանը։

Հիշեցնենք՝ Արմեն Գրիգորյանն իր հոդվածում պնդել է, որ Հայաստանի՝ Եվրամիությանն անդամակցելու հեռանկարը քաղաքական, աշխարհագրական և տնտեսական իրողությունների պայմաններում անիրատեսական է։ Նրա գնահատմամբ՝ այդ նպատակին հասնելու փորձերը ոչ թե կնվազեցնեն, այլ կխորացնեն Հայաստանի կախվածությունը Ռուսաստանից՝ միաժամանակ սահմանափակելով արտաքին քաղաքական մանևրելու հնարավորությունները։ Գրիգորյանը կարծում է, որ Հայաստանը պետք է խորացնի համագործակցությունը ԵՄ-ի և այլ միջազգային գործընկերների հետ՝ առանց անդամակցությունը դարձնելու արտաքին քաղաքականության նպատակ։

Մանրամասները՝ տեսանյութում։

Արփի Հակոբյան