Վենսը հայտարարել է, որ Իրանի հետ պատերազմը հանրապետականների պարտության պատճառն է ընտրություններում

Հանրապետական կուսակցությունը պարտվել է ԱՄՆ Կոնգրեսի միջանկյալ ընտրություններում՝ կորցնելով վերահսկողությունը թե՛ Սենատի, թե՛ Ներկայացուցիչների պալատի նկատմամբ Իրանի դեմ պատերազմի պատճառով։ Այս մասին  հայտարարել է ԱՄՆ փոխնախագահ  Ջեյ Դի Վենս իր X-ի իր միկրոբլոգում, գրում է DW-ի ռուսական ծառայությունը։

«Մեր պարտության պատճառը պատերազմն է։ Նախագահն ինքը երեկ երեկոյան ընդունել է դա»,- գրել է Վենսը։ Նրա խոսքով՝ ընտրությունների գլխավոր խնդիրն այն էր, որ շատ մարդիկ, որոնք 2024 թվականին աջակցել էին Թրամփին և Վենսին, 2026-ին իրենց ձայնը տվել են դեմոկրատներին։

Վկայակոչելով անանուն սոցիոլոգին, որին Վենսը համարում է քաղաքական ոլորտի ամենախելացի մարդկանցից մեկը՝ փոխնախագահը ներկայացրել է չորս պայման, որոնց կատարման դեպքում հնարավոր կլիներ կրկին արժանանալ հիասթափված ընտրողների աջակցությանը։ Դրանք են՝ պատերազմի դադարեցումը, կյանքի թանկացման և գնաճի դեմ պայքարի վրա կենտրոնացումը, «Ամերիկան՝ առաջինը» քաղաքականության իրականացումը և Իսրայելի հետ հարաբերությունների վերանայումը։

Միևնույն ժամանակ Վենսը չի համարում, որ միգրացիոն քաղաքականությունը վճռորոշ նշանակություն է ունեցել ընտրողների որոշման հարցում։

Ավելի վաղ ԱՄՆ նախագահ Դոնալդ Թրամփը հայտարարել էր, որ 2026 թվականի փետրվարի 28-ին սկսված Իրանի դեմ պատերազմը մասամբ դարձել է միջանկյալ ընտրություններում Հանրապետական կուսակցության պարտության պատճառը։

«Իրանն իր դերն է ունեցել»,- The Wall Street Journal-ին տված հեռախոսային հարցազրույցում ասել էր նա։ Միևնույն ժամանակ Թրամփը խոստովանել էր, որ չի զղջում իր կայացրած որոշման համար։ «Ես ճիշտ եմ վարվել։ Նույնը կրկին կանեի»,- նշել էր նա։

ԱՄՆ նախագահի խոսքով՝ ընտրողների շրջանում ամենամեծ դժգոհությունն առաջացրել է ոչ թե պատերազմը, այլ դրա հետևանքով նավթի գների աճը։ Իսկ հանրապետականների պարտության հիմնական պատճառը Թրամփը համարել էր քվեաթերթիկներում իր անվան բացակայությունը։ «Գլխավոր պատճառն այն է, որ իմ անունը քվեաթերթիկներում չկար»,- հավելել էր նա։

Ի դեպ, ավելի ուշ Թրամփը համաձանել էր  Ջեյ Դի Վենսի այն հայտարարության հետ, որ հանրապետականները միջանկյալ ընտրություններում պարտվել են Իրանում իրականացված ռազմական գործողության պատճառով։

«Կարծում եմ՝ դա մեծ մասամբ ճիշտ է, քանի որ բերեց բենզինի գները փոքր-ինչ, բայց կարճ ժամանակով բարձրացան»,- ասել էր նա՝ պատասխանելով լրագրողի խնդրանքին մեկնաբանել Վենսի հայտարարությունը։

Թրամփը նաև նշել էր, որ պատրաստ է ընդհանուր լեզու գտնել դեմոկրատների հետ, եթե նրանք «չցանկանան զբաղվել ապակառուցողական գործունեությամբ»։ Հակառակ դեպքում նախագահի ձեռքում կմնա վետոյի իրավունքը, ընդգծել էր նա։

ԱՄՆ նախագահը նշել էր, որ Իրանի դեմ պատերազմը, իր կարծիքով, արժեր բոլոր ջանքերը և Սպիտակ տունը «այլընտրանք չուներ»։

Բացի այդ՝ Թրամփը հայտարարել էր, որ իրեն չի անհանգստացնում իմպիչմենթի հարցը։ «Ոչ, ոչ, ոչ, դա ինձ բոլորովին չի անհանգստացնում։ Կարծում եմ՝ եթե դեմոկրատները գնան այդ քայլին, դա կկործանի Դեմոկրատական կուսակցությունը, քանի որ կլինի  իմպիչմենթ առանց  որևէ հիմքի»,- ասել էր նա։

Նախնական տվյալներով՝ Հանրապետական կուսակցությունը կորցրել է առնվազն յոթ տեղ Սենատում և 29 տեղ՝ Ներկայացուցիչների պալատում։ Միևնույն ժամանակ դեմոկրատներն արդեն ապահովել են մեծամասնություն երկու պալատներում էլ։

Հիմա Սենատում հանրապետականներն ունեն 44 տեղ, իսկ դեմոկրատները՝ 54։ Եվս երկու տեղի հարցը կլուծվի ձայների հետագա հաշվարկի արդյունքում։ Ներկայացուցիչների պալատում այս պահին ընտրված են համարվում 139 հանրապետական և 237 դեմոկրատ, իսկ մնացած 59 տեղերի բաշխումը դեռ պետք է որոշվի։ Համեմատության համար  2020 թվականի Սենատի ընտրությունների արդյունքներով հանրապետականները ստացել էին 50 տեղ, դեմոկրատները՝ 48, իսկ երկու տեղ զբաղեցրել էին անկախ թեկնածուները։ Նույն թվականին Ներկայացուցիչների պալատում Հանրապետական կուսակցությունը ստացել էր 222, իսկ Դեմոկրատական կուսակցությունը՝ 213 տեղ։

Թարգմանությունը՝ Էմմա Չոբանյանի