Որտեղ եղել ա երաշխավոր, վերջում եղել ա աղետ․ Նիկոլ Փաշինյան. ՏԵՍԱՆՅՈՒԹ

Ազգային ժողովում TRIPP համաձայնագրի վերաբերյալ քննարկման ընթացքում ՀՀ վարչապետ Նիկոլ Փաշինյանն անդրադարձավ ընդդիմության այն թեզերին, թե նախագծում բացակայում է երաշխավորի ինստիտուտը։

Պատգամավոր Քնարիկ Հարությունյանy հետաքրքրվեց՝ արդյոք երրորդ կողմի երաշխավոր ներգրավելու առաջարկը չի սահմանափակի Հայաստանի ինքնիշխանությունը և երկրի անվտանգային ու տնտեսական պատասխանատվությունը չի տեղափոխի այլ պետության վրա։

«Արդյոք ընդդիմության այս խորհուրդը, այս խոսույթը, այսինքն՝ երաշխավորի ներմուծումը չի ենթադրում հրաժարվել Հայաստանի Հանրապետության ինքնիշխանությունից, և մեր երկրի անվտանգային, տնտեսական պատասխանատվությունը դրվում է երրորդ երկրի վրա»,- հարցրեց Հարությունյանը։

Պատասխանելով՝ Նիկոլ Փաշինյանը հայտարարեց, որ երաշխավորների անհրաժեշտության մասին խոսելիս պետք է հաշվի առնել Հայաստանի և հայ ժողովրդի պատմական փորձը։

«Բոլոր նրանց, ովքեր երաշխավորներ են փնտրում, ես խորհուրդ եմ տալիս ծանոթանալ Հայաստանի վերջին տասնամյակների և հայ ժողովրդի վերջին համարյա 150 տարվա պատմությանը։ Բոլոր այն դեպքերում, երբ եղել են երաշխավոր, երաշխավորներ, դա Հայաստանի համար, հայ ժողովրդի համար ավարտվել է աղետով․ ճշգրիտ այնտեղ, որտեղ եղել է երաշխավոր, վերջը եղել է աղետ»,- ասաց վարչապետը։

Փաշինյանի խոսքով՝ երաշխավորի ինստիտուտի վրա շեշտադրում անելը պատմական և ներկայիս իրողությունների սխալ ընկալման հետևանք է։

«Այդ երաշխավորի խոսույթը տանելը չիմացության հետևանք է, պատմության չիմացության հետևանք է, ընթացիկ իրողությունների չիմացության հետևանք է»,- հայտարարեց նա։

Վարչապետը որպես օրինակ հիշատակեց նաև Ուկրաինայի անվտանգության երաշխավորների հարցը՝ նշելով, որ այդ փորձը ևս ցույց է տալիս նման մեխանիզմների սահմանափակումները։

Մանրամասները՝ տեսանյութում։

Եվգենյա Համբարձումյան