28.10.2026 | 23:23
Քննարկվել են Լուվրի և Հայաստանի պատմության թանգարանի միջև համագործակցության հեռանկարները
ՔԿ-ն քրեական վարույթ չի նախաձեռնել Յաշար Քասիմովի՝ ՀՀ սահմանը հատելու դեպքով
Հասարակություն
27.10.2026 | 18:12
ՀՀ Քննչական կոմիտեն քրեական վարույթ չի նախաձեռնել Յաշար Քասիմովի՝ ՀՀ պետական սահմանը հատելու դեպքով։ Քննչական կոմիտեն, Factor.am-ի գրավոր հարցմանն ի պատասխան հայտնել է, որ այդ դեպքով հաղորդում չեն ստացել։
Հիշեցնենք՝ ՀՀ ԱԱԾ-ն հոկտեմբերի 22-ին հայտնել էր, որ 58-ամյա Ադրբեջանի քաղաքացի Յաշար Քասիմովը մոլորվել և հայտնվել է Հայաստանում՝ Տավուշի մարզում։ Երեկ էլ՝ հոկտեմբերի 26-ին, ԱԱԾ-ից հայտնեցին, որ հոկտեմբերի 24-ին Յաշար Քասիմովը վերադարձվել է Ադրբեջանի Հանրապետություն։
Միջազգային իրավունքի փորձագետ Արա Ղազարյանն ավելի վաղ Factor.am-ի հետ զրույցում ասել էր, որ պետք է քրեական վարույթ նախաձեռնվի՝ անկախ այն հանգամանքից՝ ադրբեջանցին դիտավորյա՞լ է հատել ՀՀ պետական սահմանը, թե՞ պարզապես մոլորվել է։
«Քրեական վարույթի նախաձեռնման նպատակը փաստերը ստուգելն է, որպեսզի պարզեն՝ հանցակազմ կա՞, թե՞ ոչ, հիմա եթե այդ ընթացքում պարզեցին, որ հանցավոր արարք կա, արդեն սկսվում է քրեական հետապնդումը, իսկ եթե չկա հանցավոր արարք, այդ դեպքում արդեն վերադարձնելու որոշում է կայացվում»,- բացատրեց Ղազարյանը։
Արդյո՞ք հայկական կողմը Ադրբեջանի քաղաքացուն վերադարձրել է միայն պատշաճ քննություն իրականացնելուց և սահմանը հատելու հանգամանքները պարզելուց հետո․ աս և մի շարք այլ հարցերով հոկտեմբերի 22-ին գրավոր դիմել ենք ԱԱԾ, սակայն մինչ այժմ պատասխան չենք ստացել։
Արփի Հակոբյան
