16.10.2026 | 23:30
Երևանում ընդունվել է «Հանուն բնության գործողությունների» հռչակագիրը
Սպիտակ տան նոր մամուլի քարտուղար Քեթի Զաքարիան հեռացվել է աշխատանքից․ The New York Times
Քաղաքականություն
16.10.2026 | 22:37
Սպիտակ տան նոր մամուլի քարտուղար Քեթի Զաքարիան հեռացվել է աշխատանքից։ Այս մասին հայտնում է The New York Times-ը՝ հղում անելով երեք աղբյուրի։
Fox News-ը գրում է, որ Զաքարիայի պաշտոնանկությունը դեռ «սպասվում է»։ Թրամփի բարձրաստիճան խորհրդականներից մեկը նույնպես Axios-ին ասել է, որ ակնկալում է՝ Զաքարիան առաջիկա «մի քանի օրվա ընթացքում» կհեռանա պաշտոնից։
Սպիտակ տունը լրագրողների՝ մեկնաբանություն ստանալու հարցմանը չի պատասխանել։
ԱՄՆ նախագահ Դոնալդ Թրամփի խոսքով՝ ինքը Զաքարիային հորդորել է վերանայել իր աշխատանքը․ «Ես նրան ասացի՝ անկեղծ ասած, քո տեղը լինեի, կվերանայեի իմ որոշումը։ Մտածիր այդ մասին, բայց ես քո տեղը լինեի՝ կվերանայեի այն»։
Նախագահը նաև նշել է, որ մամուլը դաժան է եղել Զաքարիայի նկատմամբ, և ինքը երբեք նման բան չի տեսել։
Հիշեցնենք՝ Սպիտակ տունը Քեթի Զաքարիային մամուլի քարտուղարի պաշտոնում նշանակելու մասին հայտարարել էր հոկտեմբերի 9-ին։ Նա առաջին ճեպազրույցն անցկացրել է հոկտեմբերի 13-ին։ Այն տևել է 15 րոպեից մի փոքր ավելի, որի ընթացքում նա խոսելու հնարավորություն է տվել ընդամենը երեք լրագրողի և չի կարողացել պատասխանել բոլոր հարցերին։
Դրանից հետո Թրամփի վարչակազմում կարծիք են հայտնել, որ նա պաշտոնում «անհաջող մեկնարկ է ունեցել»։
Թրամփը Զաքարիային ներկայացրել էր որպես փաստաբան, իսկ ինքը՝ Զաքարիան, Fox News-ի եթերներում իրեն ներկայացրել էր որպես իրավաբան։ Սակայն լրագրողներին չի հաջողվել ապացույցներ գտնել, որ նա հանձնել է իրավաբանի արտոնագիր ստանալու քննությունը։ Ավելի ուշ Զաքարիան ինքն է խոստովանել, որ չի հանձնել քննությունը։
