12.10.2026 | 18:02
Հոկտեմբերի 15-ին և 16-ին Երևանում մի շարք փողոցներ ժամանակավորապես կփակվեն․ ՆԳՆ
Եթե սահմանապահ զորքերը չեն, ՊՆ-ն էր, հարց ա՝ ինչի՞ ԱԱԾ փոխտնօրենը ազատվեց․ Մեսրոպ Մանուկյան․ ՏԵՍԱՆՅՈՒԹ
Քաղաքականություն
12.10.2026 | 16:37
Ազգային ժողովի պաշտպանության և անվտանգության հարցերի մշտական հանձնաժողովի նիստում քննարկվում է ընդդիմադիր պատգամավորների կողմից առաջարկվող նախագիծ՝ կապված Սյունիքի մարզի Շաքի գյուղ ադրբեջանցի զինծառայողի ներխուժման մասին։ «Հայաստան» խմբակցության պատգամավոր Մեսրոպ Մանուկյանը հանձնաժողովի նախագահ Վիլեն Գաբրիելյանից հետաքրքրվեց թեմայի շուրջ իշխանական խմբակցության դիրքորոշմամբ։
Ընդդիմադիր պատգամավորի խոսքով՝ միջադեպի մասին առաջին երեք օրերին լռություն էր պահպանվում, և քրեական վարույթներ հարուցվեցին միայն այն ժամանակ, երբ մամուլում տեղեկատվական արտահոսք եղավ, և Ազգային ժողովում ճնշում գեներացվեց։
Մանուկյանը նաև ուշադրություն հրավիրեց Սասուն Միքայելյանի այն հայտարարությանը, թե տվյալ հատվածում ոչ թե սահմանապահ զորքերն են տեղակայված, այլ բանակը։
«Եթե սահմանապահ զորքերը չեն եղել, այլ ՊՆ-ն, ապա անտրամաբանական է դառնում, թե ինչո՞ւ ԱԱԾ տնօրենի տեղակալին ազատեցին աշխատանքից։ Բացի այդ, եթե ադրբեջանական կողմն ի սկզբանե հայտնել էր զինվորի բացակայության մասին, ինչո՞ւ բնակիչներին նախապես չէին զգուշացրել վտանգի մասին»,- հետաքրքրվեց ընդդիմադիր պատգամավորը։
Արձագանքելով՝ հանձնաժողովի նախագահ Վիլեն Գաբրիելյանը հերքեց, թե քրեական վարույթները հարուցվել են հանրային ճնշման ներքո։ Նրա մեկնաբանմամբ՝ Ադրբեջանից զինծառայողի բացակայության մասին տեղեկությունը դեռևս չէր նշանակում, որ նա անպայմանորեն գտնվում է Հայաստանի տարածքում։ Գաբրիելյանի խոսքով՝ Հայաստանում նրա գտնվելու փաստը հաստատվել է միայն այն պահից, երբ նա փաստացի հայտնաբերվել և վնասազերծվել է։
Գաբրիելյանը նաև նշեց, որ հարցի շուրջ լսումներ կազմակերպելու որոշման նախագծի վերաբերյալ իշխանական խմբակցությունն այս պահին դեռևս միասնական դիրքորոշում չունի։
Մանրամասները՝ տեսանյութում։
Անի Թամրազյան
