12.10.2026 | 18:02
Հոկտեմբերի 15-ին և 16-ին Երևանում մի շարք փողոցներ ժամանակավորապես կփակվեն․ ՆԳՆ
Լավրովը հայտարարել է, թե Զելենսկին «արժանի չէ մարտի դաշտում դադարի»
Քաղաքականություն
12.10.2026 | 16:44
Ռուսաստանը մտադիր չէ Ուկրաինային ռազմաճակատում շունչ քաշելու հնարավորություն տալ։ Այս մասին հայտարարել է ՌԴ արտաքին գործերի նախարար Սերգեյ Լավրովը։
«Չեմ կարծում, թե նա (Ուկրաինայի նախագահ Վլադիմիր Զելենսկին – խմբ․) արժանի է դադարի։ Չեմ կարծում, թե մենք հերթական անգամ պետք է հավատանք հավաստիացումներին ու խոստումներին»,- լրագրողներին ասել է Լավրովը՝ պատասխանելով Ռուսաստանի և Ուկրաինայի միջև էներգետիկ հրադադարի շուրջ ստեղծված իրավիճակի վերաբերյալ հարցին, որի մասին ավելի վաղ հայտարարել էր ԱՄՆ նախագահ Դոնալդ Թրամփը։
«Նախագահը (ՌԴ նախագահ Վլադիմիր Պուտինը – խմբ․) այս մասին շատ հստակ է արտահայտվել․ մենք շարունակում ենք հասնել հատուկ ռազմական գործողության նպատակներին։ Դրանք բոլորին քաջ հայտնի են, և մենք երբեք չենք փոխել դրանք՝ ի տարբերություն Զելենսկիի և նրա եվրոպացի տերերի զիգզագների ու տատանումների։ Հետևաբար, մենք ոչ ոքի առջև արդարանալու կարիք չունենք»,- հավելել է Լավրովը։
Նա նաև նշել է, որ Ուկրաինայի նախագահ Վլադիմիր Զելենսկիի արձագանքն ԱՄՆ նախագահ Դոնալդ Թրամփի, այսպես կոչված, էներգետիկ հրադադարի մասին հայտարարությունն արտացոլում է կրակը դադարեցնելու նրա ձգտումը՝ ցանկացած գնով։
«Ինչ վերաբերում է այդ պայմանավորվածության կարգավիճակին, կարելի է վկայակոչել Զելենսկիի արձագանքը։ Երբ նրան նույն հարցն են տվել, նա ասել է, որ նման պայմանավորվածության մասին չի լսել, ուրախ կլինի պարզաբանումներ ստանալ և պատրաստ է հրադադարի։ Թրամփի հայտարարության վերաբերյալ նրա ձևական զարմանքը միայն մեկ բան է արտացոլում՝ նա շատ է ցանկանում օգտագործել հանրային դաշտում հայտնվող ցանկացած խոսք, ցանկացած նախաձեռնություն և ցանկացած գաղափար՝ բոլոր հնարավոր ու անհնար միջոցներով հրադադարից օգտվելու իր շահագրգռվածությունն առաջ մղելու համար»,- ասել է ՌԴ արտաքին գործերի նախարարը։
Ավելի վաղ Զելենսկին առաջարկել էր ստիպել ՌԴ նախագահ Վլադիմիր Պուտինին՝ համաձայնել 60 օր տևողությամբ լիակատար հրադադար հաստատել, որպեսզի Ուկրաինան կարողանա ընտրություններ անցկացնել։ Այս ամենը հնչել էր Թրամփի այն հայտարարությունների ֆոնին, որ Ուկրաինային «ժամանակն է նոր առաջնորդ ընտրել»։ Սա տեղի էր ունեցել նաև այն բանից հետո, երբ Թրամփը հայտարարել էր Կրեմլի ղեկավար Վլադիմիր Պուտինի հետ ձեռք բերված պայմանավորվածության մասին՝ ռուսական դիզելային վառելիքն ամերիկյան և համաշխարհային շուկաներ մատակարարելու վերաբերյալ։
Թարգմանությունը՝ Էմմա Չոբանյանի
