12.10.2026 | 16:53
«Ընտրությունն իրականացրել է ՄԱԿ-ը»․ COP17-ի գնումների վերաբերյալ ընդդիմության մեղադրանքներին արձագանքել է ՇՄ նախարարությունը
Խորհրդային հետախույզի թոռը հաղթել է Ֆրանսիայում սոցիալ-դեմոկրատների նախնական ընտրություններում
Քաղաքականություն
12.10.2026 | 15:28
Ֆրանսիայում սոցիալ-դեմոկրատների նախնական ընտրություններում (փրայմերիզ) հաղթել է Եվրոպական խորհրդարանի 46-ամյա պատգամավոր Ռաֆայել Գլյուքսմանը։ Նա «Հանրային տարածք» (Place publique) կուսակցության առաջնորդն է, խորհրդային հետախույզի թոռ։ Գլյուքսմանը ստացել է ավելի քան 79,6 հազար ձայն կամ ձայների 66,13 տոկոսը՝ ըստ նախնական հրապարակված արդյունքների, և դարձել 2027 թվականի նախագահական ընտրություններում չափավոր ձախերի թեկնածուն։ Այս մասին գրում է The Insider-ը։
Առաջին անգամ, 1969 թվականին Սոցիալիստական կուսակցության հիմնադրումից ի վեր, այն կներկայացնի քաղաքական գործիչ, որը կուսակցության անդամ չէ։
Գլյուքսմանի գլխավոր մրցակիցը՝ Սոցիալիստական կուսակցության առաջին քարտուղար Օլիվյե Ֆորը, ստացել է ձայների շուրջ 14,5 տոկոսը։ Նախագահի նախկին թեկնածու Սեգոլեն Ռուայալը զբաղեցրել է երրորդ տեղը՝ ստանալով 7,62 տոկոսը։ Քվեարկության մյուս երկու մասնակիցները՝ պատգամավորներ Էմանուել Մորելը և Ժերոմ Գեժը, ստացել են 6 տոկոսից պակաս ձայն։
Հաղթողը որոշվել է առաջին փուլում, ուստի երկրորդ փուլի անհրաժեշտություն չկա։
Քվեարկությանը մասնակցել է շուրջ 120,6 հազար մարդ։ Սա շուրջ 22 անգամ պակաս է, քան 2011 թվականին սոցիալիստների նախնական ընտրությունների առաջին փուլում մասնակցածների թիվը, հաշվարկել է The Insider-ը՝ համեմատելով երկու ընտրությունների արդյունքները։ Այն ժամանակ թեկնածուի ընտրությանը մասնակցել էր ավելի քան 2,66 միլիոն մարդ, իսկ նախնական ընտրություններում հաղթած Ֆրանսուա Օլանդը հետագայում դարձել էր Ֆրանսիայի նախագահ։
Քվեարկությունն անցկացվել է առցանց՝ հոկտեմբերի 9-ից։ Քվեարկության մեկնարկի օրը կազմակերպիչները հայտնել են e-votez հարթակի վրա կիբերհարձակման մասին։ Բոտերը միաժամանակ մեծ թվով միացումներ են ստեղծել՝ դժվարացնելով ընտրողների մուտքը հարթակ։ Դրա պատճառով քվեարկությունը երկարաձգվել է մինչև հոկտեմբերի 11-ը՝ կիրակի։ Սոցիալիստական կուսակցությունից պնդում են, որ հարձակումը չի ազդել ձայների պահպանվածության և արդյունքների հավաստիության վրա։
Գլյուքսմանը հաղթանակից հետո խոստացել է միավորել ժողովրդավարական ձախ ուժերին՝ ծայրահեղ աջերի դեմ պայքարելու համար։ Նա նաև հանդես է եկել Էմանուել Մակրոնի քաղաքականությունից հրաժարվելու և ձախ դաշտում Ժան-Լյուկ Մելանշոնի գերիշխանությանը վերջ տալու օգտին։Օլիվյե Ֆորը ընդունել է պարտությունը և հաստատել իր աջակցությունը հաղթողին։ Միևնույն ժամանակ, «Անհնազանդ Ֆրանսիա» կուսակցության առաջնորդ Մելանշոնը չի մասնակցել նախնական ընտրություններին և մտադիր է առաջադրվել ինքնուրույն։
Գլյուքսմանը հանդես է գալիս Ուկրաինային աջակցելու, եվրոպական պաշտպանությունն ուժեղացնելու և Ռուսաստանի նկատմամբ քաղաքականությունն ավելի խիստ դարձնելու օգտին։
The Insider-ը գրել էր, որ 2009-2013 թվականներին նա աշխատել է որպես Վրաստանի նախագահ Միխեիլ Սաակաշվիլիի խորհրդական։ 2024 թվականին Եվրոպական խորհրդարանի ընտրություններում նրա գլխավորած սոցիալիստների և Place publique-ի միասնական ցուցակը ստացել է ձայների 13,8 տոկոսը։
Գլյուքսմանը ֆրանսիացի փիլիսոփա Անդրե Գլյուքսմանի որդին է։ Վերջինը հայտնի էր կոմունիզմի քննադատությամբ։ Նրա հորական պապը՝ Ռուբին Գլյուքսմանը, խորհրդային հետախույզ է եղել։ 2026 թվականի սկզբին ֆրանսիական Public Sénat հեռուստաալիքը վավերագրական ֆիլմ է թողարկել ընտանիքի պատմության մասին։ TF1-ը հայտնել է, որ քաղաքական գործիչն իր պապի՝ խորհրդային հետախուզության համար աշխատելու մասին իմացել է ֆիլմի նկարահանումների ընթացքում։ Ռուբին Գլյուքսմանը զոհվել է 1940 թվականին, երբ նրան Մեծ Բրիտանիայից Կանադա տեղափոխող նավը տորպեդահարվել է գերմանական սուզանավի կողմից։
Նշվում է, որ ավելի վաղ Գլյուքսմանը, ենթադրաբար, ռուսական ապատեղեկատվական արշավի թիրախ էր դարձել։ Օգոստոսին The Insider-ը հաղորդել էր, որ Փարիզի դատախազությունը հետաքննություն է սկսել ֆրանսիացի քաղաքական գործիչների, այդ թվում՝ Գլյուքսմանի, Գաբրիել Աթալի և Էդուար Ֆիլիպի մասին կեղծ տեսանյութերի տարածման գործով։
Ֆրանսիայի նախագահական ընտրությունների առաջին փուլը նախատեսված է 2027 թվականի ապրիլի 18-ին, իսկ երկրորդ փուլը՝ մայիսի 2-ին։
Թարգմանությունը՝ Էմմա Չոբանյանի
