08.10.2026 | 15:25
Գրականության ոլորտում Նոբելյան մրցանակը շնորհվել է կանադացի հեղինակի
Ես էլ ասեմ` ՀՀ-ն նոր ՌԴ-ի չի վերածվի, լավ ժանր չի․ Փաշինյանը` Մեդվեդևի հայտարարության մասին․ ՏԵՍԱՆՅՈՒԹ
Քաղաքականություն
08.10.2026 | 13:09
Լրագրողների հետ ճեպազրույցի ընթացքում վարչապետ Նիկոլ Փաշինյանն անդրադարձավ ՌԴ անվտանգության խորհրդի փոխնախագահ Դմիտրի Մեդվեդևի հայտարարությանը, թե Հայաստանը կարող է վերածվել «նոր Ուկրաինայի», ինչպես նաև խոսեց ԱՊՀ գագաթնաժողովի շրջանակում Վլադիմիր Պուտինի և Իլհամ Ալիևի հետ հնարավոր շփումների մասին։
Լրագրողի հարցին ի պատասխան՝ վարչապետն ընդգծեց, որ Հայաստանն արդեն իսկ կանգնել է նմանատիպ անվտանգային վտանգների առջև, երբ 2022 թվականի սեպտեմբերին ՀԱՊԿ-ը չկատարեց դաշնակցային իր պարտավորությունները Հայաստանի առջև։
Անդրադառնալով Մեդվեդևի հայտարարություններին՝ Փաշինյանն ասաց․ «Ի՞նչ է նշանակում այդ արտահայտությունը, պարոն Մեդվեդևը ինչի՞ համար է անում․․․ Այսինքն՝ այդ կսմիթները, այդ սպառնալիքները ինչի՞ համար են։ Հիմա ես էլ, ասենք այդ նույն տրամաբանությամբ, բռնեմ ասեմ ՝ «ցանկանում ենք, որ Հայաստանը նոր Ռուսաստանի չվերածվի»՝ նկատի ունենալով այն, որ, ենթադրենք, Ռուսաստանի ամենատարբեր տեղերում պայթյուններ են հնչում»։
Վարչապետի խոսքով՝ դա «լավ ժանր չէ», և Հայաստանը ոչ մի ուրիշ բանի չի վերածվելու․ «Հայաստանը վերածվելու է ավելի ու ավելի շատ Հայաստանի Հանրապետության, ավելի ու ավելի շատ ինքնիշխան պետության։ Սա՛ է մեր ճանապարհը»։
Անդրադառնալով Թուրքմենստանում նախատեսված ԱՊՀ գագաթնաժողովի շրջանակներում ՌԴ նախագահ Վլադիմիր Պուտինի և Ադրբեջանի նախագահ Իլհամ Ալիևի հետ հնարավոր հանդիպումներին՝ Փաշինյանը նշեց, որ պաշտոնական առանձին հանդիպումներ նախատեսված չեն, սակայն շփումներն ու զրույցները անխուսափելի են։
«Այսօր, վաղը միասին նույն տարածքում ենք լինելու, այդ ձևաչափերում շփումներ լինում են միանշանակ, բայց պաշտոնապես հանդիպում նախատեսված չի։ Եթե հանկարծ հընթացս պարզվի, որ կա անհրաժեշտություն, գուցե դա էլ հնարավոր կլինի»,- ասաց նա։
Վարչապետը հավելեց, որ նախօրեին հեռախոսազրույց է ունեցել Վլադիմիր Պուտինի հետ՝ վերջինիս ծննդյան առիթով։
Մանրամասները՝ տեսանյութում։
Եվգենյա Համբարձումյան
