Արցախի ժողովուրդ էթնիկ զտման զոհ է դարձել, նմանատիպ կարգավիճակ պետք է լինի․ Բեգլարյան․ ՏԵՍԱՆՅՈՒԹ

Ազգային ժողովի Մարդու իրավունքների պաշտպանության և հանրային հարցերի մշտական հանձնաժողովի նախաձեռնությամբ՝ ընդդիմադիր «Հայաստան» խմբակցության պատգամավոր Լիլիթ Գալստյանի կազմակերպմամբ տեղի ունեցավ աշխատանքային քննարկում՝ «Արցախահայերի սոցիալ-տնտեսական, իրավական խնդիրներ և լուծումներ» թեմայով:

Արցախի նախկին պետնախարար Արտակ Բեգլարյանը քննարկման ընթացքում մատնանշեց բռնի տեղահանված արցախցիների ինտեգրման և իրավունքների պաշտպանության 5 առանցքային խնդիրները։

Արտակ Բեգլարյանի գնահատմամբ՝ առաջնային խնդիրը կարգավիճակն է: Ըստ նրա՝ գործող կարգավորումները, որոնցով արցախցիները զրկվեցին ՀՀ քաղաքացիությունից և ստացան սովորական փախստականի կարգավիճակ (ինչպես օտարերկրացիները), անհամարժեք են ստեղծված իրավիճակին:

«Արցախի ժողովուրդը, հաշվի առնելով, որ ցեղասպանության և էթնիկ զտման զոհ է դարձել, պետք է ունենա հենց նմանատիպ կարգավիճակ, ինչը կդառնար սոցիալական ու իրավական մի շարք հարցերի հիմքը, այդ թվում՝ բենզինի պահեստի պայթյունի հետևանքով զոհվածների հարազատների կարգավիճակի կարգավորման համար»,- ընդգծեց նա՝ հավելելով, որ ճիշտ որոշումը կլիներ արցախցիներին ՀՀ քաղաքացի թողնելն ու օրենսդրորեն հատուկ պաշտպանություն սահմանելը:

Անդրադառնալով սոցիալական վիճակին՝ Բեգլարյանը նշեց, որ պետական աջակցության ծրագրերի կրճատումից հետո արցախցիների վիճակը կտրուկ վատթարացել է: Արտակ Բեգլարյանը քննադատեց կառավարության բնակարանային ապահովման ռազմավարությունը:

Մանրամասները՝ տեսանյութում։

Անի Թամրազյան