Ինչո՞ւ է գրավադրվում ՀԷՑ-ը

80 մլն դոլար «Տաշիր Կապիտալ» ՓԲԸ-ն գրավ է դնում «Հայաստանի էլեկտրական ցանցեր» ընկերության կանոնադրական կապիտալի մոտ 70 տոկոս բաժնետոմսերը՝ 80 մլն վարկի դիմաց: ՀԷՑ-ի ներկայացրած հիմնավորմամբ՝ նպատակը Հայաստանում էլեկտրաէներգիայի բաշխման բարելավմանը և էներգետիկ անկախության և արդյունավետության բարձրացմանը նպաստելն է:

Տնտեսագետ Արտակ Մանուկյանը, մինդեռ, Factor.am-ի հետ զրույցում մտահոգություն հայտնեց, որ նոր վարկի ձեռք բերման հետ կապված բավարար տեղեկատվություն չկա, իսկ ներկայացված հիմնավորումներն էլ, նրա խոսքով, «լղոզված են»:

«2016 թվականի ֆինանսական հաշվետվություններից երևում է, որ ՀԷՑ-ի կապիտալում բավական մեծ վարկերի և փոխառությունների մասնաբաժին կա՝ մոտ 95 մլն դոլար: Եվ ուշագրավն այն է, որ 40 մլն եվրոյի կարգի գումարը շուկայականից բարձր տոկոսադրույքով նախկին բաժնետիրոջ կողմից տրված փոխառություն է: Եթե մենք այս կոնտեքստում դիտարկում ենք, որ վարկը փոխարինվում է կամ ռեստրուկտուրիզացիայի է ենթարկվում, այսինքն՝ վարկային ավելի մեղմ պարտավորություններ է ՀԷՑ-ը ստանում՝ փոխարինելով շուկայականից բարձր գներով փոխառությունների դիմաց վճարները համեմատաբար ավելի բարենպաստ պայմաններով, դա միայն դրական է, բայց այստեղ էլ հարցեր կան, թե սա՞ է արդյոք հիմնական մոտիվացիան»,- նշեց Արտակ Մանուկյանը՝ կասկած հայտնելով, որ վերջում գուցե պարզվի՝ խնամի-ծանոթ-բարեկամ տարբերակով անարդյունավետ խաղացողների համար վարկ են վերցնում:

Ինչ վերաբերում է ՀԷՑ-ի բաժնետոմսերի՝ վարկատուներին անցնելու հնարավորությանը, ապա դրանք, տնտեսագետի խոսքով, ռազմավարական նշանակության օբյեկտներ են, որտեղ կա բազմաֆունկցիոնալ վերահսկողություն:

Պետությունը, ըստ Մանուկյանի, ունի անհրաժեշտ գործիքակազմ՝ այդ ռազմավարական օբյեկտներըի կառավարումն անհրաժեշտության դեպքում իր ձեռքում պահելու համար:

Մանրամասները՝ տեսանյութում:

Շողիկ Գալստյան