12.10.2026 | 22:45
ԵՄ-ն Հայաստանին օգնել է հակազդել օտարերկրյա միջամտությանը․ Կալլաս
ՆԱՏՕ-ի գլխավոր հրամանատարը ներկայացրել է ՌԴ-ի հնարավոր հարձակման դեպքում ծրագիրը՝ Կալինինգրադին ու Պետերբուրգին հարվածներով
Քաղաքականություն
12.10.2026 | 22:23
ՆԱՏՕ-ի գերագույն գլխավոր հրամանատար Ալեքսուս Գրինկևիչը Վարշավայում կայացած անվտանգության համաժողովում ունեցած ելույթում հայտարարել է, որ Ռուսաստանի հիբրիդային հարձակումները նյարդայնացնում են եվրոպացի քաղաքացիներին, սակայն նախազգուշացրել է Մոսկվային, որ ՆԱՏՕ-ն միշտ պատրաստ է պատասխան հարված հասցնել ցանկացած հարձակման դեպքում։ Այս մասին գրում են Financial Times-ը և Reuters-ը, փոխանցում է Current time-ը։
«Ես չեմ կարծում, որ հակամարտությունն անխուսափելի է կամ մոտալուտ։ Դա այդպես չէ։ […] Սակայն հաշվի առնելով դիվերսիաների և հրկիզումների ծավալները՝ կարծում եմ, որ դաշինքի շուրջ բնակչությունը որոշակի անհանգստություն է զգում։ Եվ ես ցանկանում եմ վստահեցնել մեր դաշինքի մեկ միլիարդ քաղաքացիներին՝ մենք գլուխ կհանենք։ Մենք գիտենք, թե ինչ պետք է անել և ինչպես դա անել։ Նաև ցանկանում եմ, որ նրանք, ովքեր գուցե մտածում են մեզ վնասելու մասին, իմանան՝ մենք գլուխ կհանենք։ Եվ ավելի լավ է՝ նրանք չհարձակվեն դաշինքի վրա, որովհետև, կրկնում եմ, մենք հստակ գիտենք, թե ինչ ենք անելու պաշտպանության ոլորտում»,- ասել է նա։
The Wall Street Journal-ը նշում է, որ Գրինկևիչը համաժողովում ներկայացրել է ՆԱՏՕ-ի արևելյան թևում Ռուսաստանի հնարավոր հարձակումը զսպելու ծրագիր։ Ծրագիրը նախատեսում է ներդրումներ կատարել «մատչելի զանգվածային արտադրության մշակումներում»՝ նկատի ունենալով համեմատաբար էժան ուկրաինական անօդաչու թռչող սարքերը։ Պարբերականի հաղորդմամբ՝ ռազմավարության նպատակն է կասեցնել սկզբնական հարձակումը և կանխել հակառակորդի հետագա առաջխաղացումը, եթե այն շարունակվի։
«Մենք չենք ձգտում ռազմավարական պարտության մատնել մեր հակառակորդին։ Փոխարենը՝ մեր նպատակն է հենց սկզբից կասեցնել ցանկացած հարձակում»,- ասել է նա։
Ըստ WSJ-ի՝ ծրագրի շրջանակում նախատեսվում է ստեղծել ընդարձակ «ինքնավար գոտի», որտեղ անօդաչու թռչող սարքերն ու ցամաքային ռոբոտները կկարողանան հետ մղել Ռուսաստանի հարձակումը՝ առանց դաշնակիցների շրջանում զգալի կորուստների։
Միևնույն ժամանակ, ՌԴ-ի հնարավոր հարձակման դեպքում, նախատեսվում է հեռահար հրթիռներով հարվածներ հասցնել Ռուսաստանի հրամանատարական կետերին և հակաօդային պաշտպանության համակարգերին՝ Կալինինգրադում, Սանկտ Պետերբուրգի մերձակայքում և Բելառուսում։
Գրինկևիչը հայտարարել է, որ որոշել է հրապարակայնորեն ներկայացնել ՆԱՏՕ-ի ծրագրերը, քանի որ վերջին շրջանում տեղի ունեցած դիվերսիաներն անհանգստություն են առաջացրել դաշինքի անդամ երկրների քաղաքացիների շրջանում։
Թարգմանությունը՝ Էմմա Չոբանյանի
