Իրանը և Օմանը համաձայնության են եկել Հորմուզի նեղուցի ու եկամուտների մասնաբաժինների շուրջ. ԻՀՊԿ

Իրանն ու Օմանը համաձայնության են եկել Հորմուզի նեղուցի իրենց մասնաբաժնի և դրանից ստացվող եկամուտների շուրջ, սակայն ռազմավարական նշանակություն ունեցող ջրային ուղին չի վերաբացվի, եթե ԱՄՆ-ը չընդունի այս երկրների պայմանները, հայտարարել է Իրանի Իսլամական հեղափոխության պահապանների կորպուսը (ԻՀՊԿ), գրում է Reuters-ը։

Իրանն ու Օմանը շաբաթներ շարունակ բանակցություններ են վարել նեղուցով երթևեկության վերահսկման շուրջ։ Պատերազմը սկսվելուց առաջ նեղուցով անցնում էր աշխարհի նավթի և հեղուկ բնական գազի փոխադրումների մեկ հինգերորդը։ Այդ ժամանակից ի վեր նավագնացության մեծ մասը դադարեցվել է, ինչը բարձրացրել է համաշխարհային էներգակիրների գները, քանի որ Թեհրանն ու Վաշինգտոնը փորձել են վերահսկողություն հաստատել ջրանցքի նկատմամբ՝ պարտադրելով առանձին շրջափակումներ։

«Հորմուզի նեղուցը պատկանում է Իրանին և Օմանին։ Մենք շուրջ մեկ ամիս բանակցություններ ենք վարում Օմանի հետ, և հասել ենք երկու կողմերի համար ընդունելի արդյունքների։ Այս բանակցությունների ընթացքում համաձայնություններ են ձեռք բերվել նեղուցի ջրերում յուրաքանչյուր երկրի բաժնի և Իրանի ու Օմանի բաժնի վերաբերյալ իրենց եկամուտներում»,- ասել է Իսլամական հեղափոխության պահապանների կորպուսի խոսնակ Հոսեյն Մոհեբին իրանական պետական ​​լրատվամիջոցների կողմից հրապարակված մեկնաբանություններում։

ԻՀՊԿ-ն մեղադրել է Միացյալ Նահանգներին Իրանի և Օմանի միջև բանակցությունները խոչընդոտելու փորձի մեջ՝ ասելով, որ դա է պատճառը, որ համաձայնագիրը հետաձգվել է։

«Եթե Միացյալ Նահանգները դադարեցնի խոչընդոտել և վերադառնա համաձայնագրին, մենք կարող ենք բացել Հորմուզի նեղուցը ձեռք բերված համաձայնագրի շրջանակում։ Եթե Միացյալ Նահանգները չընդունի մեր պայմանները, Հորմուզի նեղուցը ոչ մի դեպքում չի բացվի»,- ասել է Մոհեբին։

Չնայած վերջին շաբաթներին ԱՄՆ-ի և Իրանի միջև ակտիվ ռազմական գործողությունները հիմնականում դադարել են, խաղաղության համաձայնագրի հասնելու ուղղությամբ դիվանագիտական ջանքերը կանգ են առել, իսկ նավերի դեմ շարունակվող հարձակումների պատճառով Հորմուզի նեղուցով անցնելը շարունակում է վտանգավոր մնալ։

Կիրակի Իրանը «սև ցուցակում» է ներառել 45 նավ, ըստ ամենայնի, նպատակ ունենալով կանխել նավից նավ բեռնափոխադրումները, որոնց միջոցով էներգակիրներ արտադրող Պարսից ծոցի երկրները փորձում են շրջանցել իրանական շրջափակումը։ Աղբյուրների փոխանցմամբ՝ որոշ ընկերություններ ծրագրում են դադարեցնել «սև ցուցակում» հայտնված նավերի օգտագործումը։

Իրանի տնտեսության վրա ճնշումն ուժեղացնելու նպատակով Միացյալ Նահանգներն այս շաբաթվա սկզբին սպառնացել է պատժել այն երկրներին, որոնք շարունակում են առևտուր անել Իրանի հետ, սակայն նշել է, որ պատժամիջոցներն անմիջապես չի կիրառի։

Պատժամիջոցները չեն ներառել չինական ֆինանսական հաստատությունները, որոնք կասկածվում են Իրանից նավթի արտահանումներին աջակցելու մեջ, և որոնց մատակարարումները կրճատվել են ԱՄՆ-ի շրջափակման հետևանքով։

Իրանը ԱՄՆ-ի կողմից իր տնտեսությունը մեկուսացնելու փորձը դատապարտել է որպես «բացահայտ անօրինականության» ակտ՝ վստահություն հայտնելով, որ շատ երկրներ չեն միանա ճնշման արշավին։ Նավթի գները նվազել են արդեն երրորդ օրն անընդմեջ՝ մեկ բարելի դիմաց ավելի քան 2 դոլարով՝ հասնելով վերջին երկու շաբաթվա նվազագույն մակարդակին։

Թարգմանությունը՝ Էմմա Չոբանյանի