Սլովակիայի մայրաքաղաք Բրատիսլավայում ավարտին մոտեցող ազատ ոճի ըմբշամարտի աշխարհի մինչև 20 տարեկանների առաջնությունում օգոստոսի 22-ին պայքարի մեջ են մտել Հայաստանի վերջին ներկայացուցիչները՝ Դավիթ Դավթյանը (70 կգ), Վլադիմիր Ազարյանը (74 կգ) և Հենրիկ Հայկյանը (125 կգ):
Հենրիկ Հայկյանը բուլղարացի (9:2) և թուրք ըմբիշների (7:0) նկատմամբ հաղթանակներից հետո դուրս է եկել կիսաեզրափակիչ, որտեղ 3:10 հաշվով պարտվել է իրանցի Մոհամադ Նեժադին։ Օգոստոսի 23-ին հայ ըմբիշը կանցկացնի բրոնզե մեդալի համար գոտեմարտ։
Դավիթ Դավթյանը երկու հաղթանակ տանելուց հետո քառորդ եզրափակիչում պարտվել է ադրբեջանցի մրցակցի, որը նվաճել է եզրափակիչի ուղեգիր` հայ ըմբիշին տալով բրոնզե մեդալի համար պայքարելու հնարավորություն։ Օգոստոսի 23-ի Դավթյանը կանցկացնի սփոփիչ գոտեմարտ։
Վլադիմիր Ազարյանը հաղթանակով մեկնարկելուց հետո պարտություն է կրել երկրորդ գոտեմարտում ու ավարտել ելույթները։
Նախորդ մրցումային օրերի ընթացքում ազատ ոճի ըմբշամարտի Հայաստանի Մ-20 հավաքականին չի հաջողվել մեդալ նվաճել ԱԱ-ում:
Հիշեցնենք, որ հունահռոմեական ոճի ըմբշամարտի Հայաստանի Մ-20 հավաքականն ԱԱ-ում պայքարն ավարտել էր 1 ոսկե, 1 արծաթե ու 2 բրոնզե մեդալով: Սամվել Տերտերյանը (77 կգ) նվաճել էր աշխարհի Մ-20 չեմպիոնի կոչումը, Յուրիկ Պետրոսյանն (87 կգ) արժանացել էր արծաթե մեդալի, իսկ Յուրիկ Մխիթարյանը (67 կգ) և Էրիկ Տեր-Մաթևոսյանը (97 կգ) դարձել էին բրոնզե մեդալակիր:
Դավիթ Եղիազարյան
