21.07.2026 | 23:30
Էլեկտրամատակարարման ընդհատումներ՝ Երևանում ու մարզերում
Deutsche Welle-ն վրացերեն նոր լրագրողական նախագիծ է գործարկում․ ԵՄ-ն կաջակցի նաև հայերեն և ադրբեջաներեն հարթակների ստեղծմանը
Քաղաքականություն
21.07.2026 | 20:20
Գերմանական Deutsche Welle (DW) հանրային մեդիա ընկերությունը օգոստոսի 3-ից սոցիալական ցանցերում կմեկնարկի վրացերեն նոր լրագրողական նախագիծը։ Նախաձեռնությունն իրականացվում է Եվրամիության European Information Shield ծրագրի ֆինանսավորմամբ, որի շրջանակում նախատեսվում է ստեղծել նաև հայերեն և ադրբեջաներեն մեդիա նախագծեր
Նոր նախագիծը կգործի Instagram-ում և նախատեսված է Վրաստանի, ինչպես նաև Հարավային Կովկասի վրացալեզու լսարանի համար։ DW-ի վրացական խմբագրությունը կլուսաբանի ինչպես երկրի ներքին օրակարգը, այնպես էլ միջազգային կարևոր թեմաները։ Հետագայում նախատեսվում է նախագիծն ընդլայնել նաև այլ հարթակներում։
Վրացերեն նախագծի մեկնարկը հնարավոր է դարձել Եվրոպական միության European Information Shield («Եվրոպական տեղեկատվական վահան») նախաձեռնության ֆինանսավորման շնորհիվ։ Ծրագրի նպատակն է աջակցել անկախ լրագրությանը և հակազդել ապատեղեկատվությանը ԵՄ-ի համար ռազմավարական նշանակություն ունեցող տարածաշրջաններում։
DW-ի վրացերեն նախագիծը կմեկնարկի օգոստոսի 3-ին։
Նույն նախաձեռնության ֆինանսավորմամբ ֆրանսիական France Médias Monde (FMM)-ը և լեհական միջազգային TVP World հեռարձակողը կստեղծեն նաև հայերեն և ադրբեջաներեն լրագրողական նախագծեր։
Հարավային Կովկասի համար նախատեսված երեք նախագծերը կհամագործակցեն միմյանց հետ և պարբերաբար կփոխանակվեն բովանդակությամբ։ Ֆինանսավորումն առայժմ նախատեսված է 18 ամսով։
DW-ի գլխավոր տնօրեն Բարբարա Մասինգը նշել է, որ անկախ լրագրությունը ժողովրդավարության և քաղաքական մասնակցության կարևորագույն բաղադրիչներից է։ Նրա խոսքով՝ France Médias Monde-ի և TVP World-ի հետ համագործակցությունը կուժեղացնի Եվրոպայի աջակցությունը ազատ մամուլին և հավաստի տեղեկատվությանը մի տարածաշրջանում, որը, նրա գնահատմամբ, նպատակային կերպով ենթարկվում է ապատեղեկատվական արշավների և բախվում է առանձնահատուկ քաղաքական ու հասարակական մարտահրավերների։
