22.10.2026 | 15:02
Պուտինը հաստատել է ՌԴ կառավարությունում վերադասավորումները
ԱՄՆ-ն 10-րդ օրն անընդմեջ հարվածներ է հասցրել Իրանին․ Թեհրանը թիրախավորել է Քուվեյթում և Բահրեյնում ամերիկյան օբյեկտները, այդ թվում՝ Amazon-ի ենթակառուցվածքները
Քաղաքականություն
21.07.2026 | 10:37
ԱՄՆ զինված ուժերը հերթական զանգվածային հարձակումն են իրականացրել Իրանի դեմ՝ արդեն տասներորդ օրն անընդմեջ։ Այս մասին հայտնել է ԱՄՆ Կենտրոնական հրամանատարությունը սոցիալական ցանցերում։
«ԱՄՆ ուժերը հարվածել են Իրանի ռազմական հրամանատարական կենտրոններին, ծովային կարողություններին, հրթիռների և անօդաչու թռչող սարքերի արձակման վայրերին, ինչպես նաև հակաօդային պաշտպանության համակարգերին, որպեսզի նվազեցնեն Իրանի կարողությունը՝ շարունակել հարձակվել Հորմուզի նեղուցով անցնող առևտրային նավերի վրա։ Առևտրային նավերի տարանցումը կենսականորեն կարևոր միջազգային ծովային միջանցքով շարունակվում է»,- նշել է CENTCOM-ը X-ում հրապարակված գրառման մեջ։
Այն լրացուցիչ մանրամասներ չի տրամադրել թիրախների թվի վերաբերյալ։
Հայտարարության մեջ նաև նշվում է, որ մայիսի սկզբից ի վեր «CENTCOM-ի ուժերը նպաստել են մոտավորապես 900 առևտրային նավերի և 450 միլիոն բարել հում նավթի տարանցմանը»։
Իրանի Իսլամական հեղափոխության պահապանների կորպուսն էլ (ԻՀՊԿ) երեքշաբթի հայտարարել է, որ հարվածել է ԱՄՆ ռազմական թիրախներին, այդ թվում՝ Բահրեյնում և Քուվեյթում գտնվող հակաօդային պաշտպանության համակարգերին։
Նշվում է, որ հարված է հասցվել Բահրեյնում գտնվող երկու տարբեր ամերիկյան դիրքերում գտնվող հակաօդային պաշտպանության համակարգի և ռադարային կայանի, ինչպես նաև Քուվեյթում գտնվող հրթիռային պաշտպանության համակարգերի, ռադարների և արբանյակային ընդունման համակարգերի։ Իրանի բանակը հայտարարել է, որ կամիկաձե անօդաչու թռչող սարքերով թիրախավորել է «Քուվեյթում գտնվող երեք խոշոր ամերիկյան բազաներ»։
Բացի այդ, ԻՀՊԿ-ն հայտարարել է, որ հարձակում է իրականացրել Հորդանանում գտնվող ամերիկյան ռազմական օբյեկտի վրա։
Ավելի վաղ Հորդանանի պետական հեռուստատեսությունը հայտնել էր, որ երկրի ՀՕՊ ուժերը գիշերը Իրանից արձակված երեք հրթիռներ են որսացել են, երկուշաբթի երեկոյան մայրաքաղաք Ամմանում տագնապի ազդանշաններ են հնչել։
Իրանական պետական լրատվամիջոցների հրապարակած հայտարարության համաձայն՝ Իսլամական հեղափոխության պահապանների կորպուսը հայտարարել է, որ թիրախավորել է ամերիկյան Amazon ընկերությանը պատկանող՝ Բահրեյնում գտնվող ենթակառուցվածքները։ Բահրեյնի կողմից պաշտոնական հաստատում չի եղել։
Թարգմանությունը՝ Էմմա Չոբանյանի
