Կապրենք, կտեսնենք. Փաշինյանը` ԵՏՄ զեկույցի մասին․ ՏԵՍԱՆՅՈՒԹ

Հայաստանի իշխանությունների դիրքորոշումը ԵՏՄ-ի վերաբերյալ մնում է անփոփոխ, իսկ անդամակցության հնարավոր կասեցման տնտեսական հետևանքների մասին կանխատեսումներին ժամանակը պատասխան կտա։ Այս մասին լրագրողների հետ ճեպազրույցում հայտարարեց վարչապետ Նիկոլ Փաշինյանը։

Լրագրողն իր հարցում հիշեցրել էր, ԵՏՄ անդամ երկրների ներկայացուցիչների կազմած զեկույցը, որի համաձայն՝ Հայաստանի անդամակցության կասեցման դեպքում կանխատեսվում է ԵՏՄ-ի հետ ապրանքաշրջանառության 56%-ով անկում, ՀՆԱ-ի 15.6%-ով նվազում, գազի գնի 69%-ով թանկացում և աշխատանքային միգրանտների պայմանների խստացում։

Արձագանքելով այս տվյալներին՝ Փաշինյանը նշեց «Իմ կարծիքը մինչև հիմա արտահայտածից որևէ բան չի փոխվել։ Այդ տվյալների և կանխատեսումների վերաբերյալ՝ կապրենք, կտեսնենք։ Մեր հիմնական կենտրոնացումը Հայաստանի շարունակական զարգացումն է, մեր անկախության, ինքնիշխանության պաշտպանությունն ու հարաբերությունների դիվերսիֆիկացիան, և մենք գնալու ենք այդ ճանապարհով»։

Վարչապետը հիշեցրեց նաև Եվրամիությանն անդամակցելու գործընթաց սկսելու վերաբերյալ օրենսդրական նախաձեռնության մասին՝ ընդգծելով, որ այն կյանքի է կոչվել քաղաքացիական հասարակության նախաձեռնությամբ (50 հազար ստորագրությունների հավաքմամբ), ինչը Հայաստանում ժողովրդավարության աննախադեպ և կարևոր արտահայտություն է։

«Սա Հայաստանում ժողովրդավարության կարևոր արտահայտություն է, և մենք պատրաստվում ենք մեր երկրում ժողովրդավարությունը նույնպես պաշտպանել»,- ընդգծեց գործադիրի ղեկավարը։

Մանրամասները՝ տեսանյութում։
Անի Թամրազյան