Ստամբուլի ափին կասկածելի անօդաչու թռչող սարք է հայտնաբերվել

Թուրքական ռազմածովային հատուկ նշանակության ուժերն անվտանգ կերպով պայթեցրել են Ստամբուլի Արնավութքոյ շրջանի Քարաբուրուն ափ իջած կամիկաձե անօդաչու թռչող սարքի բեկորներ, որոնք, ենթադրաբար, պայթուցիկ նյութով են եղել։ Բնակիչները մասնատված, կասկածելի առարկան նկատել են առափնյա գծի երկայնքով և այդ մասին հայտնել իշխանություններին:

Առափնյա պահպանության ծառայության կողմից դեպքի վայր ուղարկված խմբերը նախնական գնահատում են անցկացրել՝ պարզելով, որ օբյեկտը կարող է լինել վթարված կամիկաձե անօդաչու թռչող սարք: Տեխնիկական փորձաքննությունունից հետեո օբյեկտի վրա պայթուցիկ նյութ է հայտնաբերվել։ Անվտանգության միջոցառումներից հետո խմբերն իրականացրել են սարքի վերահսկվող պայթեցում։

Ռուս-ուկրաինական պատերազմի ժամանակ իրենց նշանակետերին չհասած կամ խափանված տասնյակ անօդաչու թռչող սարքեր նախկինում հայտնվել են Սև ծովի թուրքական ափերին, ինչը մտահոգություններ է առաջացրել հարևան երկրների համար հակամարտության անվտանգության հետևանքների վերաբերյալ։

Հերթական ԱԹՍ-ն հայտնաբերվել է այն բանից հետո, երբ Թուրքիայի արտգործնախարար Հաքան Ֆիդանը Կիևում Ուկրաինայի արտգործնախարար Անդրեյ Սիբիհայի հետ համատեղ մամուլի ասուլիսում կրկին հայտարարել էր, որ պատերազմի տարածման ռիսկը, որը Թուրքիան բարձրաձայնել է հակամարտության սկսվելուց ի վեր, մնում է լուրջ՝ հղում անելով Սև ծովի անվտանգությանը սպառնացող վերջին զարգացումներին։

«Մենք չենք ուզում, որ պատերազմը տեղափոխվի Սև ծով։ Սև ծովում նավահանգիստների, լցանավերի և ձկնորսական նավակների թիրախավորումն ու քաղաքացիական անձանց կյանքը վտանգի ենթարկելը չի ​​կարող արդարացվել»,- հայտարարել էր Ֆիդանը։

Թարգմանությունը՝ Էմմա Չոբանյանի