Թրամփը հայտարարել է, որ այսօր հեռախոսազրույց է ունենալու Պուտինի հետ

Անկարայում ՆԱՏՕ-ի գագաթնաժողովի շրջանակում ԱՄՆ նախագահ Դոնալդ Թրամփը հանդիպել է Ուկրաինայի նախագահ Վլադիմիր Զելենսկիին։ Թրամփին լրագրողները հարցրել են  Ուկրաինայի նկատմամբ ռուսական ագրեսիան դադարեցնելու «պրագմատիկ» ուղու մասին։

«Նրանք պատրաստվում են գործարք կնքել։ Այս գործարքը երկար ժամանակ մշակվում էր։ Այն ունի իր դրական և բացասական կողմերը։ Նրանք գիտեն, թե ինչ է դա։ Նա գիտի, թե ինչ է դա՝ ավելի լավ, քան որևէ մեկը»,- պատասխանել է Թրամփը։

ԱՄՆ նախագահը նաև գովաբանել  է Զելենսկիին «հիանալի աշխատանք կատարելու» և «շատ արդյունավետ» լինելու համար։ Նա հավելել է՝ կարծում է, որ երկու նախագահներն էլ ցանկանում են ավարտել պատերազմը, իսկ Զելենսկին, անշուշտ, «կցանկանար վերադառնալ իր երկրի վերականգնմանը՝ այս բոլոր մահերի և ավերածությունների փոխարեն»։

ԱՄՆ նախագահը նաև նշել է, որ կաշխատի Ռուսաստանի հետ անվտանգության երաշխիքների շուրջ՝ համոզվելու համար, որ Ուկրաինան այլևս երբեք չի ենթարկվի հարձակման։

«Ռուսաստանը մեզ շատ է հարգում, և մենք աշխատելու ենք անվտանգության վերաբերյալ որևէ համաձայնագրի շուրջ։ Եթե կարողանանք ճիշտ համաձայնագիր կնքել, կօգնենք Եվրոպային… և կաշխատենք անվտանգության վերաբերյալ որևէ փաթեթի վրա»,- նշել է նա։

Թրամփը նաև հայտարարել է, որ մտադիր է այսօր հեռախոսազրույց ունենալ Ռուսաստանի առաջնորդ Վլադիմիր Պուտինի հետ։

«Հարցրեք նախագահ Պուտինին, ինչ կհարցնեիք նրան։ Որովհետև ես այս հարցը կփոխանցեմ նրան։ Այսօր կխոսեմ նրա հետ»,- ասել է Դոնալդ Թրամփը։

Թարգմանությունը՝ Էմմա Չոբանյանի