08.07.2026 | 14:26
Երևան կժամանեն միջազգային կինոյի հայտնի ներկայացուցիչներ․ «Ոսկե ծիրան»-ը ներկայացրել է ծրագրերը
Ալի Խամենիի մարմինն Իրաքում է․ հազարավոր մարդիկ են մասնակցել հուղարկավորության երթին
Քաղաքականություն
08.07.2026 | 12:46
Հազարավոր մարդիկ Իրաքի Նաջաֆ քաղաքում մասնակցել են Իրանի սպանված գերագույն հոգևոր առաջնորդ այաթոլլա Ալի Խամենեիի հուղարկավորության երթին, գրում է Al Monitor-ը։
Ճանապարհի երկայնքով մարդիկ հավաքվել են հանգուցյալ հոգևոր առաջնորդի մեծ դիմանկարներով՝ վանկարկելով «Մա՛հ Ամերիկային» և «Մա՛հ Իսրայելին», մինչ Խամենեիի դագաղը դիակառքով տեղափոխվում է փողոցներով։
Մարդկանց բազմության մեջ ծածանվել են Իրաքի և Իրանի դրոշները, ինչպես նաև Իրանի կողմից աջակցվող ազդեցիկ իրաքյան զինյալների պաստառները, որոնց կողմնակիցները միացել են երթին։
Նաջաֆը հատուկ նշանակություն ունի ամբողջ աշխարհի շիա մուսուլմանների համար՝ որպես Իմամ Ալիի՝ Մուհամմադ մարգարեի զարմիկի և փեսայի թաղման վայր։
Հուղարկավորության երթին մասնակցել են նաև Իրանի նախագահ Մասուդ Փեզեշքիանը և Իսլամական հեղափոխության պահապանների կորպուսի հրամանատարները։ Սպասվում է, որ արարողությունը կշարունակվի Իրաքի սրբավայր Քարբալա քաղաքում։Ըստ որոշ տեղեկությունների՝ Իրանի նախագահը վերադարձել է Թեհրան՝ ԱՄՆ-ի կողմից նախօրեի հարվածներից հետո։
Ալի Խամենեիի հրաժեշտի արարողությունները տեղի են ունեցել ուրբաթից երեքշաբթի՝ Իրանի մայրաքաղաք Թեհրանում և կենտրոնական Ղոմ քաղաքում։ Նա կհուղարկավորվի հինգշաբթի՝ Իրանի հյուսիսարևելյան Մաշհադ քաղաքում։ Իրանի կառավարությունը հուլիսի 9-ը ազգային սգո օր է հայտարարել։
Թարգմանությունը՝ Էմմա Չոբանյանի
