06.07.2026 | 15:28
Պորտուգալիայում, Հունաստանում, Ֆրանսիայում և Իսպանիայում անտառային հրդեհներ են մոլեգնում
Իսրայելը սպառնում է Իրանի առաջնորդներին՝ մինչ Թեհրանում շարունակվում է Ալի Խամենեիի հրաժեշտի արարողությունը
Քաղաքականություն
06.07.2026 | 12:51
Մինչ Իրանում անցկացվում է փետրվարի 28-ին ԱՄՆ-ի և Իսրայելի հարվածների հետևանքով սպանված գերագույն հոգևոր առաջնորդ այաթոլլահ Ալի Խամենեիի հրաժեշտի արարողությունը, Իսրայելի պաշտպանության նախարար Իսրայել Կացը հայտարարել է, որ ցանկացած իրանցի առաջնորդ, որը «կփորձի առաջ մղել Իսրայելը ոչնչացնելու ծրագրերը, կոչնչացվի», գրում է CNN-ը։
Նա հավելել է, որ ԱՄՆ-ի և Իսրայելի կողմից Իրանին հարվածները «վերացրել են Իսրայելի առջև ծառացած անմիջական գոյաբանական սպառնալիքները և լրջորեն վնասել Իրանի ռազմավարական կարողությունները»։
Կացը նաև քննադատել է հուղարկավորության ժամանակ «Մա՛հ Թրամփին» վանկարկող սգացողներին՝ նրանց անվանելով «ամոթալի»։
Նշենք, որ Թեհրանում ընթանում է Իրանի սպանված գերագույն առաջնորդ այաթոլլա Ալի Խամենեիի հիշատակին նվիրված մեծ երթը, դիակառքն անցնում է սգացողների մեծ բազմության միջով: Խամենեիի որդին՝ նրա իրավահաջորդ Մոջթաբան, հոր սպանությունից ի վեր դեռևս հրապարակայնորեն չի ներկայացել: Արարողության ժամանակ շատ սգացողներ ծածանում են կարմիր և սպիտակ դրոշ, որը խորհրդանշում է նահատակությունը և վրեժը շիա մուսուլմանական ավանդույթում։
Խամենեիի հուղարկավորությունը տեղի է ունենում իսլամական Մուհարրամ ամսին, երբ շիա մուսուլմանները հարգանքի տուրք են մատուցում Հուսեյնին և նրա նահատակությանը։
Այս շաբաթվա հիշատակի միջոցառումների շրջանակում Խամենեիի մարմինը կտեղափոխվի Իմամ Հուսեյնի սրբավայր Քերբալայում՝ Իրաքում, նույն վայրում, որտեղ տեղի է ունեցել հայտնի ճակատամարտը, նախքան հայրենի Մաշհադում գտնվող Իմամ Ռեզայի սրբավայրում Խամենեիին հուղարկավորելը։
Թարգմանությունը՝ Էմմա Չոբանյանի
