Բաքվում դատապարտված ռուսները կարող են փոխանակվել ՌԴ-ում դատապարտված ադրբեջանական սփյուռքի առաջնորդի հետ

Ուրալում ադրբեջանական սփյուռքի նախկին առաջնորդ Շահին Շիխլինսկիին, որը Եկատերինբուրգում գործարարների սպանությունների գործով դատապարտվել էր 24 տարվա ազատազրկման, առաջիկայում կարող են փոխանակել Բաքվում պատիժը կրող ռուսաստանցիների հետ, հաղորդում է E1-ը: Աղբյուրի համաձայն՝ դա կարող է տեղի ունենալ արդեն օգոստոսի։ Նշվում է, որ նրա որդին նույնպես կներառվի փոխանակման գործընթացում։ E1-ի երկրորդ աղբյուրը հայտնել է, որ Շահին Շիխլինսկին լավատեսորեն է տրամադրված իրավիճակի նկատմամբ, գրում է The Moscow Times-ը։

«Նա 100 տոկոսով վստահ է, որ կներառվի փոխանակման գործընթացում»,- նշել է նախկին սփյուռքի առաջնորդին մոտ կանգնած աղբյուրը։

Հունիսի վերջին Ռուսաստանի փոխարտգործնախարար Միխայիլ Գալուզինը հայտարարել էր, որ ռուսական կողմը նախատեսում է փոխանակման հարցը քննարկել Ադրբեջանի արտաքին գործերի նախարար Ջեյհուն Բայրամովի հետ Մոսկվայում հանդիպման ժամանակ։

«Մենք սպասում ենք, որ մեր քաղաքացիները շուտով ազատ կարձակվեն»,- RTVI-ին տված հարցազրույցում ասել է Գալուզինը։

Երկու երկրների միջև հարաբերությունները վատթարացել էին  2025 թվականի ամռանը՝ Եկատերինբուրգում մի շարք սպանությունների և սպանության փորձերի հետ կապված Ադրբեջանի քաղաքացիների զանգվածային ձերբակալություններից հետո: Հունիսի 27-ի գործողության ընթացքում ձերբակալվել էին  տասնյակներ, այդ թվում՝ Շահին Շիխլինսկին և նրա որդի Մութվալան: Հուսեյն և Զիյադդին Սաֆարով եղբայրները մահացել էին քննչական գործողությունների  ընթացքում: Բաքուն հայտնել էր բռնի մահվան մասին և հետաքննություն սկսել, մինչդեռ Ռուսաստանի Քննչական կոմիտեն հայտնել էր, որ եղբայրներից մեկի մահվան պատճառը սրտի անբավարարությունն է եղել։

Այս իրադարձություններից հետո, 2025 թվականի հուլիսի 1-ին, Բաքվում ձերբակալվել էին Ռուսաստանի 11 քաղաքացիներ՝ Իրանից թմրանյութերի ապօրինի շրջանառության և կիբերհանցագործության մեղադրանքով։ Այս տարվա մայիսին և հունիսին նրանք դատապարտվել են ազատազրկման։

Թարգմանությունը՝ Էմմա Չոբանյանի