Փաշինյանի անունը հեռացվել է Եկատերինբուրգում կայանալիք միջոցառման ելույթ ունեցողների ցանկից

ՀՀ վարչապետ Նիկոլ Փաշինյանը հուլիսի 6-9-ը Եկատերինբուրգում կայանալիք «Իննոպրոմ 2026» միջազգային արդյունաբերական ցուցահանդեսին ելույթ չի ունենա։  Այս մասին տեղեկանում ենք միջոցառման պաշտոնական կայքից։

Ավելի վաղ,  Radar.am-ը գրել էր, որ Հայաստանի վարչապետը մասնակցելու է«Իննոպրոմ 2026»-ին՝ հրապարակելով ցուցահանդեսի կայքից էկրանապատկեր, որտեղ ելույթ ունեցողների ցանկում նշված էր նաև Նիկոլ Փաշինյանի անունը։

Այս պահին ելույթ ունեցողների ցանկում Նիկոլ Փաշինյանի անունը չկա։

ՀՀ կառավարությունը Փաշինյանի մասնակցության վերաբերյալ տեղեկատվություն չի հաղորդել։ Վարչապետի խոսնակի և Կառավարության լրատվության ծառայության հետ կապ հաստատել մեզ չհաջողվեց։

Միաժամանակ, վարչապետի ընտանիքին պատկանող «Հայկական ժամանակը» գրում է, որ Նիկոլ Փաշինյանը մասնակցելու է «Ինպրոմ-2026» ցուցահանդեսին։

Մասնակիցների թվում է նաև ՌԴ վարչապետ Միխայիլ Միշուստինը։

Հիշեցնենք, որ վարչապետ Նիկոլ Փաշինյանը երկու օր առաջ հեռախոսազրույց է ունեցել Ռուսաստանի վարչապետի հետ։

Factor TV-ի լրագրողը երեկ Փաշինյանից հետաքրքրվեց, թե ի՞նչ է քննարկել Ռուսաստանի վարչապետ Միխայիլ Միշուստինի հետ հեռախոսազրույցի ընթացքում, արդյո՞ք զրույցի ընթացքում անդրադարձ եղել է Հայաստանից արտահանվող ապրանքների նկատմամբ կիրառվող սահմանափակումներին, և թե ու՞մ նախաձեռնությամբ է տեղի ունեցել հեռախոսազրույցը։

«Ինչ վերաբերում է Ռուսաստանի Դաշնության կառավարության ղեկավարի հետ հեռախոսազրույցին, ապա այն տեղի է ունեցել իմ նախաձեռնությամբ։ Քննարկված հարցերի շրջանակը ներկայացվել է պաշտոնական հաղորդագրության մեջ։ Պայմանավորվել ենք, որ առաջիկայում ավելի մանրամասն քննարկումներ կունենանք»,- ասաց վարչապետը։

Անի Թամրազյան