26.07.2026 | 13:17
Հայ ըմբիշները Բաքվում են
«Բացառում եմ, 2013-ի սցենարը չի կրկնվի»․ Փաշինյանը՝ ՌԴ-ի ճնշման ներքո ԵՄ մերձեցումից հրաժարվելու մասին․ ՏԵՍԱՆՅՈՒԹ
Քաղաքականություն
02.07.2026 | 12:44
ՀՀ վարչապետ Նիկոլ Փաշինյանը բացառում է 2013 թվականի իրավիճակի կրկնությունը, երբ Հայաստանը մեկ գիշերում հրաժարվեց ԵՄ-ի հետ ասոցացման համաձայնագրից և որոշեց ԵՏՄ ուղղությամբ գնալ։ Այս մասին Factor TV-ի հարցին ի պատասխան հայտարարեց վարչապետ Նիկոլ Փաշինյանը Եվրոպական հանձնաժողովի նախագահ Ուրսուլա ֆոն դեր Լայենի հետ համատեղ ասուլիսի ժամանակ։
Ըստ վարչապետի՝ այսօր նման շրջադարձն անհնար է, քանի որ Հայաստանի ժողովուրդը հստակ աջակցում է կառավարության վարած արտաքին քաղաքականությանը։
«Մյուս կողմից, մենք երբեք խնդիր չենք դրել, չունենք և չենք դնի ճգնաժամ ստեղծել Հայաստանի և Ռուսաստանի հարաբերություններում։ Մենք գործում ենք մեր երկրի շահերի շրջանակում և, բնականաբար, չենք արհամարհում մեր ոչ մի միջազգային գործընկերոջ շահերը։ Սակայն որևէ այլ գործընկերոջ շահ չենք կարող ավելի բարձր դասել, քան Հայաստանի Հանրապետության շահերն են, և սա տրամաբանական է ցանկացած երկրի համար,- ասաց վարչապետը։
Factor TV-ի լրագրողը հետաքրքրվեց, թե ինչ է վարչապետը քննարկել Ռուսաստանի վարչապետ Միխայիլ Միշուստինի հետ երեկվա հեռախոսազրույցի ընթացքում, արդյոք զրույցի ընթացքում անդրադարձ եղել է Հայաստանից արտահանվող ապրանքների նկատմամբ կիրառվող սահմանափակումներին, և թե ում նախաձեռնությամբ է տեղի ունեցել հեռախոսազրույցը։
«Ինչ վերաբերում է Ռուսաստանի Դաշնության կառավարության ղեկավարի հետ երեկվա հեռախոսազրույցին, ապա այն տեղի է ունեցել իմ նախաձեռնությամբ։ Քննարկված հարցերի շրջանակը ներկայացվել է պաշտոնական հաղորդագրության մեջ։ Պայմանավորվել ենք, որ առաջիկայում ավելի մանրամասն քննարկումներ կունենանք»,- ասաց վարչապետը։
Մանրամասները՝ տեսանյութում։
