Նախագիծը հապճեպ չի բերվել, քարոզարշավին ասվեց` հանրային ակնակալիք կա. նախարարը՝ ընտրական ցենզի մասին․ ՏԵՍԱՆՅՈՒԹ

Ներքին գործերի նախարար Արփինե Սարգսյանը լրագրողների հետ ճեպազրույցում ասաց, որ արտերկրում բնակվող ՀՀ քաղաքացիների ընտրական իրավունքի սահմանափակման վերաբերյալ օրենսդրական նախաձեռնությունը պայմանավորված չէ անվտանգության կամ այլ սպառնալիքներով։

Հարցին՝ արդյոք իշխանությունն ունի տվյալներ, որ արտերկրից ընտրությունների մասնակցելու նպատակով ժամանած քաղաքացիները խնդիրներ են ստեղծել, Սարգսյանը պատասխանեց, որ ՀՀ քաղաքացիները Հայաստանի համար սպառնալիք չեն։

Սարգսյանի խոսքով՝ նախագծի տրամաբանությունն այն է, որ համապետական ընտրություններին մասնակցեն այն քաղաքացիները, որոնք ունեն պետության հետ մշտական և կայուն կապ, ինչը, ըստ նրա, արտահայտվում է Հայաստանում մշտապես բնակվելով։

«Նախագիծը կարող է միտված լինել ժողովրդաիշխանության մասով ավելի ճշգրիտ լուծումներ նախատեսելուն, և պարտադիր չէ, որ ինչ-որ մեկը ինչ-որ բանից անհանգստանա, որպեսզի նման նախաձեռնություն լինի»,- նշեց նա։

Սարգսյանի խոսքով՝ նախագիծը հանրային պահանջի արդյունք է, քանի որ վերջին ամիսներին քաղաքացիները բարձրաձայնել են ընտրական իրավունքի վերանայման անհրաժեշտության մասին։

«Եթե անձը հաջորդ ընտրությունների ժամանակ կրկին բավարարի սահմանված չափանիշներին, կկարողանա մասնակցել ընտրություններին։ Չընտրելը դեռևս չի նշանակում, որ Հայաստանի Հանրապետությունը հրաժարվում է իր քաղաքացուց»,- ասաց Սարգսյանը։

Անդրադառնալով այն դիտարկմանը, թե նախագիծը ընտրություններից անմիջապես հետո է ներկայացվել, արդյոք կարող է վկայել հնարավոր արտահերթ խորհրդարանական ընտրությունների մասին, Սարգսյանը պատասխանեց, որ նման քննարկումներ այս պահին չկան։

«Կայացել են հերթական ընտրությունները, ժողովուրդը կատարել է իր ընտրությունը, ձևավորվել է խորհրդարանը, իսկ Սահմանադրական դատարանը շարունակում է քննել ներկայացված բողոքը։ Այլ քննարկումներ այս պահին չկան»,- ընդգծեց նախարարը։

Մանրամասները՝ տեսանյութում։