Ինչի համար են խուզարկել Իշխան Սաղաթելյանի տունն ու մեքենաները․ քրեական վարույթ է նախաձեռնվել

ՀՀ քննչական կոմիտեում Հարկադիր կատարումն ապահովող ծառայությունից ստացված հաղորդման հիման վրա քննվում է արգելանքի տակ գտնվող գույքի նկատմամբ հնարավոր ապօրինի գործողությունների և գույքի հայտարարագիր ներկայացնելուց խուսափելու դեպքը։

ՔԿ-ից հայտնում են, որ ՀՀ հակակոռուպցիոն դատարանի 2026 թվականի հունվարի 5-ի կատարողական թերթով Իշխան Սաղաթելյանին և նրա կնոջը՝ Լիանա Խաչատրյանին արգելվել էր իրենց պատկանող գույքերի տնօրինման հետ կապված որևէ գործողություն կատարել։ Դատարանը նաև որոշել էր 258 մլն 146 հազար 843 դրամի չափով արգելանք դնել սեփականության իրավունքով նրանց պատկանող գույքերի վրա։

«Հարուցված կատարողական վարույթի ընթացքում 2026 թվականի փետրվարի 2-ին Ի.Ս.-ն հրաժարվել է ներկայացնել «Գույքի, եկամուտների և գույքային իրավունքների, այդ թվում՝ պահանջի իրավունքների կազմի, քանակի և գտնվելու վայրի մասին հայտարարագիր»։ 2026 թվականի ապրիլի 28-ին Ի.Ս.-ն ներկայացրել է հայտարարագիր, որում ի թիվս այլի նշել է գույք, որը հանդիսանում է պարտադիր առգրավման ենթակա գույք: Տվյալ գույքի վրա դրվել է արգելանք»,- նշվում է իրավապահ կառույցի հաղորդագրության մեջ։

ՔԿ-ից հայտնում են, որ ստացված հաղորդման հիման վրա նախաձեռնվել է քրեական վարույթ՝ ՀՀ քրեական օրենսգրքի 509-րդ հոդվածի 1-ին մասի 2-րդ կետով՝ արգելանքի տակ գտնվող գույքի նկատմամբ ապօրինի արարքի հատկանիշներով։

Իսկ նախաքննության ընթացքում քննիչի հաղորդման հիման վրա ևս մեկ վարույթ է նախաձեռնվել՝ ՀՀ քրեական օրենսգրքի 510-րդ հոդվածի 1-ին մասով՝ պարտապանի կողմից սեփականության իրավունքով իրեն պատկանող գույքի և գույքային իրավունքների կազմի, քանակի և գտնվելու վայրի մասին հայտարարագիր ներկայացնելուց խուսափելու հատկանիշներով։ Երկու վարույթները միացվել են։

Նշենք, որ այսօր վաղ առավոտյան խուզարկել են Իշխան Սաղաթելյանի բնակարանը, նրա կնոջը սեփականության իրավունքով պատկանող երկու մեքենաները։ Խուզարկության արդյունքնում հայտնաբերվել են արտարժույթի տեսքով դրամական միջոցներ և ոսկյա զարդեր:

Արփի Հակոբյան