26.05.2026 | 17:15
ԹՐԻՓՓ-ի վերաբերյալ շրջանակային համաձայնագիրը հրապարակվեց․ ինչ են պայմանավորվել ԱՄՆ-ն ու ՀՀ-ն
Իրանը հայտարարել է ամերիկյան ԱԹՍ-ի խոցման մասին և զգուշացրել՝ հրադադարի խախտումներին խիստ պատասխան կտրվի
Քաղաքականություն
26.05.2026 | 15:37
Իրանի Իսլամական հեղափոխության պահապանների կորպուսը (ԻՀՊԿ) հայտարարել է, որ իր հակաօդային պաշտպանության ստորաբաժանումները Պարսից ծոցի վրա խոցել են ամերիկյան MQ-9 անօդաչու թռչող սարք՝ զգուշացնելով, որ ԱՄՆ-ի կողմից հրադադարի ցանկացած խախտում կարժանանա խիստ պատասխանի, գրում է իրանական Mehr գործակալությունը։
Այսօր տարածված հայտարարության մեջ ԻՀՊԿ-ն նշել է, որ ԱՄՆ-ի «ահաբեկչական բանակը», շարունակելով տարածաշրջանում միջամտողական արկածախնդրությունը և ագրեսիվ վարքագիծը, մտել է Իրանի օդային տարածք Պարսից ծոցի տարածաշրջանում։ Հայտարարության համաձայն՝ հետախուզական ճշգրիտ մոնիթորինգից հետո ԻՀՊԿ-ի հակաօդային պաշտպանության ստորաբաժանումները երկրի տարածքային օդային տարածքը պաշտպանելիս նույնականացրել և խոցել են MQ-9 անօդաչու թռչող սարք։
Նշվում է, թե ԻՀՊԿ ուժերը կրակ են բացել նաև RQ-4 անօդաչու թռչող սարքի և ներխուժող F-35 կործանիչի վրա՝ ստիպելով նրանց լքել Իրանի օդային տարածքը։
ԻՀՊԿ-ն զգուշացրել է «ագրեսոր ԱՄՆ զինվորականների» կողմից հրադադարի ցանկացած խախտման մասին՝ ընդգծելով, որ փոխադարձ հակահարվածը համարում է իր օրինական և անվիճելի իրավունքը։
ԱՄՆ Կենտրոնական հրամանատարությունն ավելի վաղ հայտարարել էր, որ երկրի զինված ուժերն «ինքնապաշտպանական հարվածներ» են հասցրել Հորմուզի նեղուցի շուրջ գտնվող իրանական հրթիռային կայաններին և նավակներին։
Թարգմանությունը՝ Էմմա Չոբանյանի
