Գինու համտեսի մրցույթ ենք կազմակերպում. ուզում ենք զբոսաշրջային երկրորդ բումը կրկնապատկենք. Պապոյան․ ՏԵՍԱՆՅՈՒԹ

«Մենք զբոսաշրջային բում ունենք, և այդ բումը շարունակվելու է»,- Կառավարության այսօրվա նիստում, քննարկելով Հայաստանի զբոսաշրջային ոլորտի վերջին վիճակագրական տվյալները, ասաց վարչապետ Նիկոլ Փաշինյանը։

Ըստ Էկոնոմիկայի նախարար Գևորգ Պապոյանի ներկայացված տվյալների՝ եթե նախկինում Ռուսաստանից եկողների մասնաբաժինը կազմում էր ընդհանուր հոսքի 50%-ից ավելին, ապա այժմ այն մոտեցել է մեկ երրորդին (36%)։ Չնայած տեսակարար կշռի նվազմանը, ռուս զբոսաշրջիկների բացարձակ թիվն աճել է։

Նշվում է, որ անցյալ տարվա հունվար-ապրիլին 183.700-ի փոխարեն այս տարի նույն ժամանակահատվածում Հայաստան է այցելել ավելի քան 245.000 ռուսաստանցի։

Վարչապետ Նիկոլ Փաշինյանը կատակով նշեց, որ սրանում իր ներդրումն ունեն նաև իր սոցիալական էջերի հետևորդները։

«Իմ Instagram-ի և TikTok-ի ռուսաստանցի հետևորդները մեկնաբանություններում խոստացել էին այցելել Հայաստան և, փաստորեն, իրականացնում են իրենց խոստումը»,- ասաց նա։

Փաշինյանն ընդգծեց, որ Վրաստանից զբոսաշրջիկների հոսքի աճ կա։

«Սա շատ լավ լուր է, և հույս ունեմ, որ ոլորտի մեր ներկայացուցիչները, գործարարները, այդ թվում՝ մարզերում, շատ ուշադիր կլինեն այս վիճակագրության նկատմամբ, որովհետև սա ի վերջո դրամական հոսքեր են։ Մեր գործարարները պետք է ջանք գործադրեն, որ այդ հոսքերից իրենց արդար մասնաբաժինը ստանան, ինչը կապված է բիզնեսի որակի, մարքեթինգի հետ»,- ասաց վարչապետը։

Մանրամասները՝ տեսանյութում։