03.11.2026 | 23:29
Թրամփը հայտարարել է, որ ԱՄՆ-ը կդադարեցնի Իսրայելին տարեկան 4 միլիարդ դոլարի օգնության տրամադրումը
Ուղեվարձ վճարելու պահանջը՝ բռնության պատճառ․ երբ վարորդը դառնում է հսկիչ. ՏԵՍԱՆՅՈՒԹ
Հասարակություն
23.04.2026 | 20:36
Համացանցում տեսանյութ է տարածվել, որտեղ երևում է, որ կինը շիշ է նետում տրոլեյբուսի վարորդի ուղղությամբ։ Մեր տեղեկություններով՝ դեպքը մեկուկես տարի առաջ է տեղի ունեցել, սակայն նմանատիպ մեկ այլ դեպք ուշագրավ զուգադիպությամբ երեկ ևս պատահել է։
«Երևանի էլեկտրատրանսպորտ» ՓԲԸ տնօրեն Սարգիս Բեջանյանի խոսքով՝ տրոլեյբուսի վարորդը հորդորել է վալիդատորով վճարել, սակայն ուղևորը շիշ է նետել նրա ուղղությամբ։
Շուրջ 10 օր առաջ էլ 3 երիտասարդ ավտոբուսի վարորդին ծեծել ու հայհոյել էին, իսկ օրեր առաջ ուղևորը թիվ 8 երթուղին սպասարկող ավտոբուսի վարորդին էր դանակահարել։ Երկու դեպքում էլ ուղևորները ձերբակալվել են, իսկ դանակահարած ուղևորը, նախնական տվյալներով, եղել է ոչ սթափ վիճակում։ «Երևանի ավտոբուս» ընկերությունից հայտնեցին, որ բռնության ենթարկված վարորդներն արդեն աշխատանքի են վերադարձել։
Ինչո՞ւ են վարորդ-ուղևոր կոնֆլիկտները հաճախակի դարձել։ Վերոնշյալ դեպքերից առնվազն մեկում լարվածությունը ծագել է վճարման հետ կապված տարաձայնությունից։ Երեք շաբաթ առաջ Երևանի քաղաքապետ Տիգրան Ավինյանը վարորդների առաջ ուղեվարձերի հավաքագրումներին մասնակցելու պահանջ դրեց։ Քաղաքապետի համար անընդունելի էր այն, որ վարորդները չվճարողներին ոչինչ չեն ասում։
Արդյո՞ք քաղաքապետարանն ունի լիազորություն պարտադրել վարորդներին ուղեվարձերը պահանջել։ Դեռ նախորդ տարի Factor TV-ի ձեռքի տակ հայտնվել էր «Երևանի ավտոբուս» ՓԲԸ-ի վարորդների աշխատանքային պայմանագրի օրինակը։ Ըստ պայմանագրի՝ վարորդը պարտավոր է, անհրաժեշտության դեպքում, ուղևորներին զգուշացնել ուղեվարձը վճարել, սակայն այսօր վարորդները հաճախ պարտադրում են վճարել և հրաժարվում են վարել մեքենան, քանի դեռ չեն վճարել։
Վարորդների վրա լրացուցիչ պարտականություն չի դրվել, պայմանագրերով նախատեսված գործառույթներն են իրականացնում՝ ասում է «Երևանի ավտոբուս» ՓԲԸ-ի մամուլի խոսնակ Գեղամ Ասատրյանը։
Երևանի քաղաքապետարանը երկու շաբաթ առաջ մրցույթ է հայտարարել՝ հանրային տրանսպորտում հսկիչների թիվն ավելացնելու համար։ Քաղաքապետարանից հայտնեցին, որ հսկիչների համալրումն ընթացքի մեջ է՝ առանց հստակ թիվ տրամադրելու։
Մանրամասները՝ տեսանյութում:
Անի Թամրազյան
