Կարապետյանի, Քոչարյանի, Ծառուկյանի ուժերին եթե քվեարկեք, ապա երեք անգամ պակաս աշխատավարձ կստանաք․ Աղաջանյան․ ՏԵՍԱՆՅՈՒԹ

«Եթե գալիք ընտրություններին քվեարկեք «Պատերազմի եռագլուխ կուսակցության»՝ այն է՝ Սամվել Կարապետյանի, Ռոբերտ Քոչարյանի կամ Գագիկ Ծառուկյանի ղեկավարած քաղաքական ուժերից և որևէ մեկի օգտին, ապա կստանաք երեք անգամ պակաս աշխատավարձ» – այս մասին ԱԺ-ում ասաց «Քաղաքացիական պայմանագիր» խմբակցության պատգամավոր Էդուարդ Աղաջանյանը։

Նրա խոսքով՝ նախկինների վերադարձը նշանակում է տնտեսական անկում, սոցիալական վիճակի վատթարացում և պատերազմի անվերջանալի շարունակություն։

«Հայաստանի տնտեսությունը կաճի մոտ մեկուկեսից երկու անգամ ավելի դանդաղ տեմպերով, Հայաստանում աշխատատեղերի ավելացման աճի տեմպը երեք անգամ կընկնի, դուք կունենաք երեք անգամ պակաս վերանորոգված և հիմնանորոգված ճանապարհներ։ Դուք կունենաք 17 անգամ պակաս նորակառույց դպրոցներ, 5 անգամ պակաս ֆինանսավորվող գիտություն, դուք կլինեք 4 անգամ պակաս առողջ կամ 4 անգամ ավելի խոցելի առողջապահական ռիսկերի առաջ։ Դուք կունենաք 10 անգամ ավելի խոցելի սոցիալապես անապահով բնակչություն, կլինեք առնվազն 12 անգամ պակաս զինված և պակաս ուժեղ։

Դուք կլինեք 100%-ով պակաս խաղաղ, որովհետև ի թիվս վերը թվարկած բարիքների, «Պատերազմի եռագլուխ կուսակցությունը» խոստանում է մեզ բերել պատերազմ կամ պատերազմի անվերջանալի շարունակականություն։ Եվ վերջապես, դուք կդադարեք լինել այս երկրի տերը, որովհետև ձեզանից կգողանան ձեր իշխանությունը ձևավորելու իրավունքը՝ Հայաստանը վերադարձնելով ընտրակեղծարարության դարաշրջան»,- նշեց ՔՊ-ական պատգամավորը։

Նշենք, որ ՀՀ Ազգային ժողովում քննարկվում է կառավարության 2025 թվականի ծրագրի կատարողականը, որին մասնակցում են վարչապետ  Նիկոլ Փաշինյանն ու կառավարության անդամները։

Մանրամասները՝ տեսանյութում։