27.07.2026 | 18:08
Ընտրությունների մասնակցելու համար ՀՀ ժամանած քանի քաղաքացի է ստացել վարժական հավաքների ներկայանալու ծանուցագրեր
Մատվիենկոն ադրբեջանական Մեջլիսի նախագահի հետ AZAL-ի օդանավի վթարի և Մոսկվա-Բաքու հարաբերությունների հարցեր է քննարկել
Քաղաքականություն
16.04.2026 | 15:05
Ռուսաստանի և Ադրբեջանի միջև AZAL-ի ինքնաթիռի վթարի հետևանքների խնդրի վերջնական կարգավորումը նոր հնարավորություններ է բացում ռուս-ադրբեջանական հարաբերությունների հետագա զարգացման համար։ Այս մասին հայտարարել է ՌԴ Դաշնային խորհրդի նախագահ Վալենտինա Մատվիենկոն Ադրբեջանի Միլլի Մեջլիսի խոսնակ Սահիբա Գաֆարովայի հետ հանդիպման ժամանակ, գրում է Ինտերֆաքսը։
«Շատ ուրախ ենք, որ երեկ մեր կառավարությունները վերջնական որոշում կայացրին՝ լուծելու ողբերգական ավիավթարի հետևանքների խնդիրը։ Մենք ավարտել ենք այս փուլը, և սա նոր հնարավորություններ է բացում ռուս-ադրբեջանական փոխշահավետ հարաբերությունների հետագա զարգացման համար»,- ասել է Մատվիենկոն։
Մատվիենկոյի և Գաֆարովայի հանդիպումը տեղի է ունեցել Ստամբուլում Միջխորհրդարանական միության 152-րդ վեհաժողովի շրջանակում։
Զրույցի ընթացքում քննարկվել է Իրանի շուրջ ստեղծված իրավիճակը։
Կողմերը նաև նշել են երկկողմ համագործակցության ավանդաբար բարձր մակարդակը միջազգային խորհրդարանական ֆորումներում, այդ թվում՝ ԱՊՀ անդամ պետությունների միջխորհրդարանական վեհաժողովում և Միջխորհրդարանական միությունում։ Նրանք նաև մտքեր են փոխանակել փոխադարձ հետաքրքրություն ներկայացնող հարցերի շուրջ։
Ադրբեջանը և Ռուսաստանը համաձայնության են եկել լուծելու հետևանքների խնդիրը, այդ թվում՝ փոխհատուցման հարցը, որը կապված է 2024 թվականի դեկտեմբերի 25-ին Ակտաու քաղաքի մոտ «Ադրբեջանական ավիաուղիներ» (AZAL) ընկերությանը պատկանող Embraer-190 ինքնաթիռի կործանման հետ։
Թարգմանությունը՝ Էմմա Չոբանյանի
