27.07.2026 | 21:00
ՔՆՆԱՐԿՈւՄ․ Զբոսաշրջիկների ռեկորդային հոսք ՀՀ 6 ամսում․ ի՞նչ խնդիրներ և առավելություններ են ի հայտ եկել․ ՏԵՍԱՆՅՈՒԹ
Հունգարիայի խորհրդարանական ընտրություններում, նախնական տվյալներով, առաջատար է ընդդիմադիր «Տիսա» կուսակցությունը․ Օրբանը 2-րդ տեղում է
Քաղաքականություն
12.04.2026 | 23:05
Հունգարիայի Ազգային ընտրական բյուրոյի տվյալներով՝ ժամը 20:30-ի դրությամբ մանդատների բաշխումը հետևյալն է․
▪️ «Տիսա»- 128 մանդատ
▪️ «Ֆիդես»- ՔԴՆԿ- 62 մանդատ
▪️ «Մեր հայրենիքը»- 8 մանդատ
Խորհրդարանում ընդհանուր կա 199 մանդատ, և մեծամասնության համար անհրաժեշտ է 100։ Սակայն սահմանադրական մեծամասնության համար, որը թույլ կտա ընդդիմությանը փոխել ինստիտուտները և չեղարկել նախկինում Վիկտոր Օրբանի կատարած նշանակումները, անհրաժեշտ է 130 մանդատ։
Միևնույն ժամանակ, «Ֆիդես»-ը դեռևս ավելի շատ ձայներ ունի կուսակցական ցուցակներով (համազգային քվեարկությամբ), սակայն «Տիսա»-ն կտրուկ հաղթում է միանձնյա ընտրատարածքներում՝ 92-ը 13-ի դիմաց։
Հունգարիայում գործում է խառը ընտրական համակարգ․ պատգամավորների մի մասը ընտրվում է կուսակցական ցուցակներով, իսկ մյուս մասը՝ ընտրատարածքներում։ Հենց ընտրատարածքներում հաղթանակներն են հաճախ որոշիչ դեր խաղում, ուստի, եթե «Ֆիդես»-ը ցուցակներով ավելի լավ արդյունք ունի, ապա ընդհանուր մանդատների թվով այժմ զգալիորեն զիջում է։
Տվյալները մնում են նախնական, սակայն կուսակցությունների միջև տարբերությունը պահպանվում և մեծանում է։
Ընտրություններից առաջ Հունգարիայում ծավալվել է կոշտ քաղաքական պայքար։ Իշխանությունները և ընդդիմությունը փոխադարձ մեղադրանքներ են հնչեցնում արտաքին ազդեցության և միջամտության փորձերի վերաբերյալ։ «Տիսա» կուսակցության առաջնորդ Պետեր Մագյարը պնդում է, որ վարչապետ Վիկտոր Օրբանի շրջապատը կապված է Ռուսաստանի հետ և օգտագործում է նրա աջակցությունը՝ իշխանությունը պահպանելու համար։ Իր հերթին «Ֆիդես»-ի ներկայացուցիչները մեղադրում են ընդդիմությանը Բրյուսելի և Կիևի շահերին ծառայելու և երկիրը Ուկրաինայի պատերազմում ներգրավելու փորձերի մեջ։
