Վթարի ենթարկված ոստիկանները թեև Փաշինյանին չէին ուղեկցում, բայց նրա այցի առնչությամբ էին Լոռի մեկնում

Factor.am-ի տեղեկություններով Ապարան-Քուչակ ճանապարհին վթարի ենթարկված ոստիկանության գվարդիայի ավտոբուսի ուղևոր-ծառայողները մեկնում էին Լոռու մարզ Նիկոլ Փաշինյանի և ՔՊ-ի հանդիպումների ընթացքում հանրային կարգ ապահովելու համար։ Այս տեղեկությունը Factor.am-ին հաստատել են ՆԳՆ երկու պաշտոնյա։

Factor.am-ը փորձեց այս տեղեկատվությունների վերաբերյալ մեկնաբանություններ ստանալ ՆԳՆ խոսնակից, սակայն, վերջինս փոխանցեց, որ մինչ այս հրապարակված պաշտոնական տեղեկատվությանն ավելացնելու ոչինչ չկա։

Հիշեցնենք` ոստիկանությունն առավոտյան հայտնեց, որ այսօր՝ ժամը 7:50-ի սահմաններում, Քուչակ-Ապարան ճանապարհին միմյանց են բախվել ՆԳՆ ոստիկանության «Հոնդա» ավտոբուսը և «Նիսան» մեքենան։ Ըստ նախնական տվյալների՝ ճանապարհատրանսպորտային պատահարի հետևանքով մահացել է 1, իսկ բուժօգնության դիմել՝ 12 անձ։ Նախաձեռնվել է քրեական վարույթ։

ՔՊ վարչության փոխնախագահ Վահագն Ալեքսանյանը Ֆեյսբուքում գրել է, թե Ապարանի ճանապարհին վթարված ավտոբուսը չէր կարող ուղեկցել ՀՀ վարչապետին, քանի որ առավոտյան ժամը 8։00-ին դեռ եղել են Երևանի ՔՊ գրասենյակի մոտ։

Նշենք, որ գվարդիայի ծառայողները, ոչ թե այդ պահին ուղեկցում էին վարչապետին, այլ նախապես մեկնում էին Լոռի, որպեսզի հանրային միջոցառման շրջանակներում հասարակական կարգն ապահովեին։

Հավելենք, որ Քննչական կոմիտեից ավելի վաղ հայտնել էին, որ  «Համացանցում շրջանառվում է ապատեղեկատվություն՝ իբր տեղի ունեցած վթարը ՆԳՆ ոստիկանության գվարդիայի ավտոբուսի մեղավորությամբ է եղել: Սակայն, դեպքի վայրի զննությամբ պարզվել է, որ «Նիսան» մակնիշի ավտոմեքենան հանդիպակաց գոտում բախվել է «Հյունդայի» մակնիշի ավտոբուսին:

Մյուս ապատեղեկատվությունը կապված է՝ ոստիկանության գվարդիայի ավտոբուսի՝ ՀՀ վարչապետի ավտոշարասյանն ուղեկցելու հետ, որը նույնպես չի համապատասխանում իրականությանը, քանի որ ՀՀ ՆԳՆ ոստիկանության գվարդիայի ծառայողները նշված տրանսպորտային միջոցով ուղևորվել են Լոռու մարզ՝ ծառայություն իրականացնելու»։

Նարեկ Կիրակոսյան