06.10.2026 | 16:07
Թուրքիան և Պակիստանը զորքեր կտեղակայեն Սաուդյան Արաբիայում՝ հութիների հարձակումների ֆոնին
Վրաստանի իշխանությունները մտադիր են Թբիլիսիում առգրավել հինգ ընտանիքի սեփականություն՝ Հեյդար Ալիևի անվան կենտրոնի կառուցման համար
Քաղաքականություն
08.04.2026 | 17:55
Թբիլիսիում Հեյդար Ալիևի անվան կենտրոնի կառուցման պատճառով հինգ ընտանիք կարող է կորցնել իր սեփականությունը, գրում են ադրբեջանական լրատվամիջոցները։
Կենտրոնը նախատեսվում է կառուցել պատմական Աբանոտուբանի թաղամասում։ Նշվում է, որ անտեսելով բնակիչների բողոքները՝ հինգ ընտանիքի սեփականությունը կբռնագրավվի նախագծի համար։ Համապատասխան որոշումը ստորագրել է Վրաստանի էկոնոմիկայի նախարար Մարիամ Կվրիվիշվիլին։
Այս որոշման համար հիմք է հանդիսացել «Անհետաձգելի պետական կարիքների համար գույքի առգրավման կարգի մասին» օրենքը։ Օրենքի համաձայն՝ առգրավումը թույլատրվում է միայն նախնական, լրիվ և արդարացի փոխհատուցմամբ՝ համաձայն Վրաստանի Սահմանադրության 19-րդ հոդվածի։
BM.ge-ի հաղորդմամբ՝ նախագիծը համարվել է «անհետաձգելի հանրային անհրաժեշտություն»։ Քանի որ իշխանությունները չեն կարողացել համաձայնության գալ գույքի սեփականատերերի հետ կամավոր գնման վերաբերյալ, որոշում է կայացվել գույքը հարկադիր բռնագրավելու մասին։
Սկզբում շինարարությունը նախատեսված էր սկսել Գորգասալի փողոցում 2023 թվականի հոկտեմբերի 25-27-ը, որտեղ տեղի է ունեցել հիմնարկեքի արարողությունը։ Սակայն նախագծման ընթացքում պարզ է դարձել, որ հողամասը բավարար չէ։ Հետևաբար, նախագծին ավելացվել է տարածք, որում երկու բնակելի անշարժ գույք է առկա, որոնցից մեկն արդեն գնվել է պետության կողմից։
Նախարարի 2026 թվականի ապրիլի 3-ի հրամանում նշվում է, որ վրացական կողմի մասնակցությունը բազմամիլիոն դոլարանոց ներդրումային նախագծում, ի թիվս այլնի, ներառում է անշարժ գույքի ձեռքբերում։
Նշված բակում կա 24 սեփականատեր։ Նրանցից 13-ը համաձայնել են առաջարկվող գնման պայմաններին։ Եվս հինգ անձ, որոնք տիրապետում են ընդհանուր առմամբ 11 անշարժ գույքի (բնակելի տարածքներ և ձեղնահարկ), հրաժարվել են։
Փաստաթղթում ընդգծվում է, որ նախագիծը «կարևոր հանրային նշանակություն» ունի, ուստի հարկադիր բռնագրավումը համարվում է անհրաժեշտ։ Այն նաև մեջբերում է Վրաստանի Սահմանադրական դատարանի 2007 թվականի մայիսի 18-ի որոշումը, որում նշվում է մասնավոր և հանրային շահերի միջև հավասարակշռությունը պահպանելու անհրաժեշտության մասին։
Սեփականատերերն իրավունք ունեն մեկ ամսվա ընթացքում բողոքարկել նախարարի որոշումը դատարանում։
Նշենք, որ Ադրբեջանի նախագահ Իլհամ Ալիևը ապրիլի 6-ին պետական այցով Վրաստանում էր։
Թարգմանությունը`Էմմա Չոբանյանի
