Բիձինա Իվանիշվիլին ընդունել է Ալիևին. հայտնի է՝ ինչ հարցեր են քննարկվել

«Վրացական երազանք» կուսակցության հիմնադիր և պատվավոր նախագահ Բիձինա Իվանիշվիլին Թբիլիսիում ընդունել է Ադրբեջանի նախագահ Իլհամ Ալիևին և ադրբեջանական պատվիրակությանը, հայտնում է «Վրացական երազանք»-ի մամուլի ծառայությունը։

Հանդիպմանը մասնակցել է նաև Վրաստանի վարչապետ Իրակլի Կոբախիձեն։

Իվանիշվիլին շնորհակալություն է հայտնել Իլհամ Ալիևին Վրաստան կատարած այցի համար և նշել, որ «Վրաստանի և Ադրբեջանի միջև բարեկամական հարաբերությունները գտնվում են ամենաբարձր մակարդակի վրա, ինչը շահավետ է երկու երկրների համար»։

Նա ընդգծել է երկու երկրների միջև խոր և համապարփակ տնտեսական հարաբերությունների կարևորությունը, տարանցիկ միջանցքի առավելագույն օգտագործման ներուժը և նշել, որ սերտ գործընկերությունը, ընդհանուր առմամբ, հավասարապես ծառայում է ինչպես Վրաստանի, այնպես էլ Ադրբեջանի ազգային շահերին։

Իվանիշվիլին շնորհակալություն է հայտնել Իլհամ Ալիևին «Հարավային Կովկասի տարածաշրջանում խաղաղ և կայուն միջավայրի ապահովմանը ցուցաբերած աջակցության համար» և նշել, որ հաշվի առնելով անվտանգության բազմաթիվ մարտահրավերները, կենսականորեն կարևոր է, որ երկու երկրների քաղաքական ղեկավարությունը գործադրի բոլոր ջանքերը խաղաղությունը և տնտեսական զարգացումը պահպանելու համար։

Հանդիպմանը քննարկվել են էներգետիկայի ոլորտում սերտ համագործակցությունը և Վրաստանն ու Ադրբեջանը համատեղ իրականացվող տրանսպորտային ու էներգետիկ նախագծերը։ Մասնավորապես, կարևորվել է Բաքու-Թբիլիսի-Կարս երկաթուղին, որը առանցքային  դեր է խաղում տարածաշրջանային կապի ապահովման գործում։ Բիձինա Իվանիշվիլին ընդգծել է, որ Վրաստանը շարունակում է բաց մնալ ադրբեջանական ներդրումների համար, որոնք վերջին տարիներին ակտիվ աճ են գրանցում։

Ալիևը շնորհակալություն հայտնել Բիձինա Իվանիշվիլիին ջերմ ընդունելության համար: Ադրբեջանի նախագահը նշել է, որ Վրաստանը ամենագրավիչ, կայուն և հետաքրքիր ներդրումային ուղղություններից մեկն է: Նա նաև ընդգծել է երկկողմ նախագծերը, էներգետիկ միջանցքի կարևորությունը և Վրաստանի ակտիվ մասնակցությունը ադրբեջանական բնական ռեսուրսների արտահանման գործում:

Ալիևը վերահաստատել է իր պատրաստակամությունը շարունակելու համատեղ աշխատանքը տարածաշրջանում խաղաղությունն ու կայունությունը պահպանելու համար:

Իլհամ Ալիևի պետական  այցը Վրաստան ավարտվել է։

Թարգմանությունը`Էմմա Չոբանյանի