«Ինչո՞ւ պիտի խորան չգնայի». ինչպես Փաշինյանն անցավ հավատացյալների բազմության միջով. ՏԵՍԱՆՅՈՒԹ

«Կներեք՝ ինչո՞ւ պիտի խորան չգնամ: Այսինքն՝ էդ որտե՞ղ է ասված, որ ես պետք է խորան չգնամ»,- լրագրողների հետ ճեպազրույցում այսօր ասաց Նիկոլ Փաշինյանը։

Լրագրողները վարչապետից այսօր հետաքրքրվել են, թե ինչու կիրակի՝ Սուրբ Աննա եկեղեցում պատարագի ժամանակ, նա, մարդկանց բազմությունը ճեղքելով, հասավ խորան այն դեպքում, երբ սովորաբար ուշացածները կանգնում են եկեղեցու սրահի վերջնամասում։

Նիկոլ Փաշինյանը հերքեց «ճեղքելով անցնելու» մասին պնդումները՝ նշելով, որ եկեղեցում մարդկանց հոսքը շարունակական է եղել։ Նրա խոսքով՝ ինքը հերթ է կանգնել մուտքի մոտ, սպասել, մինչև մարդիկ դուրս գան, և ապա ներս մտել,  ինչպես մյուսները։ Factor TV-ն համադրել է Փաշինյանի խոսքն ու պատարագի օրվա կադրերը՝ պարզելու, թե որքանով են իրականությանը համապատասխանում վարչապետի պնդումները։ 

Հիշեցնենք՝ կիրակի Սուրբ Աննա եկեղեցում միջադեպ էր տեղի ունեցել։ Այն պահին, երբ Փաշինյանի անվտանգության աշխատակիցները ճանապարհ էին բացում, որպեսզի նա դուրս գար, մի երիտասարդ նախ ընդդիմացավ, ապա փորձեց ձեռքով հարվածել վարչապետին։ Այդ երիտասարդը 18-ամյա Դավիթ Մինասյանն է, որը երեկ դատավոր Մնացական Մարտիրոսյանի որոշմամբ կալանավորվեց երկու ամսով։ Նա մեղադրվում է խուլիգանության և պաշտոնատար անձի օրինական ծառայողական կամ քաղաքական գործունեությանը միջամտելու համար։

Երեկ միջադեպից նոր կադրեր էին տարածվել, որտեղ երևում է՝ ինչպես է պետական պահպանության ծառայության աշխատակիցը հարվածում Դավիթ Մինասյանին։ Ի դեպ, ՊՊԾ աշխատակիցն աչքի էր ընկել նաև Հովհաննավանքում․ քաղաքացու բերանը փակելով՝ հեռացրել էր վանքից, երբ վերջինս կարգալույծ հռչակված Տեր Արամին ավազանի (Ստեփան Ասատրյան) անունով էր դիմել։                                                                                                                        

Եկեղեցու միջադեպի մյուս մասնակիցները՝ Դավիթ Մինասյանի եղբայր Միքայել Մինասյանն ու Գևորգ Գևորգյանը երեկ ազատ են արձակվել։ Վերջինի նկատմամբ կիրառվել է 5 մլն դրամ գրավ ու բացակայելու արգելք, իսկ Միքայել Մինասյանի նկատմամբ՝ միայն բացակայելու արգելք։ Նա մեղադրվում է այդ գործողություններին աջակցելու համար, իսկ Գևորգյանն այդ ամենը կազմակերպելու համար։ Վերջինը հերքել է միջադեպի կազմակերպված լինելն ու հայտնել, որ չի ընդունում ներկայացված մեղադրանքները։ Միքայել Մինասյանն էլ, երեկ քննչական վարչությունից դուրս գալով, միայն նշեց, որ լավ է և իրեն լավ են վերաբերվել։

Արփի Հակոբան