17.07.2026 | 21:00
ՔՆՆԱՐԿՈւՄ․ Իսպանիա vs Արգենտինա․ Ֆուտբոլային մեծ բախում՝ Աշխարհի չեմպիոնի գավաթի համար․ ո՞ր թիմը կհաղթի․ ՏԵՍԱՆՅՈՒԹ
Իրանը հայտնել է, որ ԱՄՆ-ի և Իսրայելի հարվածները վնասել են 120 թանգարան և պատմական շենք
Քաղաքականություն
27.03.2026 | 18:21
ԱՄՆ-ի և Իսրայելի կողմից Իրանի վրա կատարված հարվածները պատերազմի սկզբից ի վեր վնասել են առնվազն 120 թանգարան և մշակութային ու պատմական վայրեր ամբողջ երկրում։ Այս մասին հայտնել է Թեհրանի քաղաքային խորհրդի մշակութային ժառանգության կոմիտեն։
«Տարբեր նահանգներում առնվազն 120 թանգարան, պատմական շենքեր և մշակութային վայրեր անմիջականորեն թիրախավորվել են և լուրջ կառուցվածքային վնասներ են կրել»,- ասել է կոմիտեի ղեկավար Ահմադ Ալավին։
Հաղորդվում է, որ վնասներ կրած կառույցների թվում են ՅՈՒՆԵՍԿՕ-ի ցանկում ընդգրկված Գոլեսթան պալատը, Սաադաբադի պալատը, Մարմարե պալատը և Թեյմուրթաշի տունը, որը հայտնի է նաև որպես Պատերազմի թանգարան։
ՄԱԿ-ը, իր հերթին, հայտնում է, որ ՅՈՒՆԵՍԿՕ-ի ցուցակում ընդգրկված երկրի 29 վայրերից առնվազն չորսը վնասվել է պատերազմի ընթացքում՝ Գոլեսթան պալատը, Չեհել Սոտուն պալատը Սպահանում, Մասջեդ-ե Ջամե մզկիթը նույն քաղաքում և Խորամաբադ հովտի նախապատմական վայրերը։
Միացյալ Նահանգներն ու Իսրայելը փետրվարի 28-ին ռազմական արշավ սկսեցին Իրանի դեմ՝ սպանելով երկրի գերագույն հոգևոր առաջնորդ այաթոլլահ Ալի Խամենեիին ու այլ պաշտոնյաների։ Պատերազմն ընդգրկել է գրեթե ամբողջ Մերձավոր Արևելքը։
Թարգմանությունը՝ Էմմա Չոբանյանի
