27.10.2026 | 09:30
Հարի Քեյնը՝ «Ոսկե գնդակի» դափնեկիր
Աբու Դաբիում առնվազն մեկ մարդ է զոհվել իրանական հրթիռային հարվածի հետևանքով․ Al Jazeera
Քաղաքականություն
28.02.2026 | 14:53
Աբու Դաբիում առնվազն մեկ մարդ է զոհվել իրանական հրթիռային հարվածի հետևանքով, հաղորդում է Al Jazeera-ն՝ հղում անելով ԱՄԷ պետական լրատվական գործակալությանը։
ԱՄԷ իշխանությունները հայտնել են, որ հակաօդային պաշտպանության համակարգերի կողմից որսացված հրթիռներից մեկի բեկորները ընկել են Աբու Դաբիի բնակելի թաղամասում, ինչի հետևանքով զոհվել է մեկ քաղաքացի։
ԱՄԷ պաշտպանության նախարարությունը քաղաքացիական ենթակառուցվածքների վրա հարվածները անվանել է «վտանգավոր սրացում և վախկոտ գործողություն, որը սպառնում է քաղաքացիական բնակչության անվտանգությանը և խաթարում կայունությունը»։
Իրանական հարվածը, ինչպես ասվում է Պաշտպանության նախարարության հայտարարության մեջ, «ազգային ինքնիշխանության և միջազգային իրավունքի կոպիտ խախտում է»։
ԱՄԷ-ն «ամբողջական իրավունք ունի արձագանքել այս սրացմանը և ձեռնարկել բոլոր անհրաժեշտ միջոցները իր տարածքը պաշտպանելու համար», – հայտարարել է Պաշտպանության նախարարությունը։
Ականատեսները նաև հայտնել են Դուբայում՝ Ջումեյրա հանգստավայրի մոտ, իրանական հրթիռների խոցման մասին։
Հիշեցնենք, որ այսօր՝ փետրվարի 28-ի առավոտյան ԱՄՆ-ը և Իսրայելը հարվածներ են հասցրել Իրանի ուղղությամբ։ Իսրայելի արտաքին գործերի նախարարությունը հայտարարել էր, որ Իսրայելը կանխարգելիչ հարված է հասցրել Իրանին՝ Իսրայելին սպառնացող վտանգը չեզոքացնելու համար։
ԱՄՆ նախագահ Դոնալդ Թրամփը ևս հայտարարել էր Իրանի դեմ լայնածավալ մարտական գործողություններ սկսելու մասին՝ շեշտելով, որ դրանց նպատակն ամերիկյան ժողովրդին պաշտպանելն է Իրանի ռեժիմի սպառնալիքներից։
