Ե՞րբ ենք սկսում Ծարավ աղբյուրի մանկապարտեզի շինարարությունը․ Ավինյանը՝ ենթակային․ ՏԵՍԱՆՅՈՒԹ

«Երևան քաղաքի Աջափնյակ վարչական շրջանի Հալաբյան 33/1 հասցեում գտնվող թիվ 40 մսուր-մանկապարտեզի հին շենքի քանդման, նորի կառուցման և բակի բարեկարգման, ինչպես նաև Կենտրոն վարչական շրջանի Կորյունի 8 հասցեում գտնվող թիվ 1 մսուր-մանկապարտեզի նոր շենքի կառուցման և բակի բարեկարգման նախագծանախահաշվային փաստաթղթերի կազմման աշխատանքների ձեռքբերման նպատակով հայտարարված մրցույթները կայացել են, նախագծման աշխատանքները մեկնարկել են»,- Երևանի քաղաքապետարանի գործակարգավարական խորհրդակցությանը զեկուցեց շինբարեկարգման վարչության պետի պաշտոնակատար Անդրանիկ Թևոսյանը։

Պաշտոնյայի խոսքով՝ ընթացքի մեջ են Դավթաշեն վարչական շրջանի 2-րդ թաղամասի 7/1 հասցեում գտնվող թիվ 59 մանկապարտեզի շենքի քանդման, նոր մանկապարտեզի կառուցման և բակի բարեկարգման նախագծանախահաշվային փաստաթղթերի կազմման աշխատանքները։

Ըստ տեխնիկական առաջադրանքի՝ երեք մանկապարտեզները կունենան ֆիզկուլտուրայի և հանդիսությունների դահլիճներ, ինչպես նաև կհագեցվեն բոլոր անհրաժեշտ ժամանակակից համակարգերով՝ օդափոխության, հակահրդեհային, տեսահսկման, ջրահեռացման և այլն։ Բակերում նախատեսվում է կառուցել ոռոգման համակարգ, տեղադրել մանկական խաղասարքեր և տաղավարներ, իրականացնել կանաչապատման աշխատանքներ։

Տիգրան Ավինյանը հետաքրքրվեց նաև Ծարավ աղբյուր թաղամասում մանկապարտեզի շինարարության մեկնարկի ժամկետներով։ Թևոսյանը տեղեկացրեց, որ շինարարության մեկնարկը պայմանավորված է գնումների ընթացակարգով։

Մանրամասները՝ տեսանյութում։