24.07.2026 | 21:25
TikTok-ն անչափահասների համար վտանգավոր է․ Եվրոպական հանձնաժողովը պահանջներ է ներկայացրել ընկերությանը
Հայաստանը հրաշալի օրինակ է, թե ինչպես կարճ ժամանակամիջոցում երկիրը կարող է փոխվել․ CampCamp 2018-ը՝ Երևանում. ՏԵՍԱՆՅՈՒԹ
08.11.2018 | 19:03
Ստեղծարար գաղափարների ներկայացում, մոտիվացնող ծրագրեր ու նոր հնարավորություններ․ CampCamp 2018-ը Հայաստանում է։
Նախաձեռնությունը Պրահայի քաղաքացիական հասարակության կենտրոնինն է։ Արևելյան Եվրոպայի ու Կենտրոնական Ասիայի 12 երկրներում կենտրոնն աջակցում է կայուն ու ակտիվ քաղաքացիական հասարակության ստեղծմանը։ Կենտրոնի ղեկավար Ռոստիսլավ Վալվոդայի խոսքով՝ համախմբել են նախկին խորհրդային հանրապետությունների, Արևելյան Եվրոպայի, Կենտրոնական Ասիայի ու Ռուսաստանի լավագույն ակտիվիստներին՝ միմյանց հետ փոխանակելու հաղորդակցության և քաղաքացիական գործունեության իրենց ռազմավարություններն ու փորձը։
CampCamp 2018-ը քառօրյա ինտենսիվ համագործակցություն է ՝ ստեղծագործ մտքերով ակտիվիստների, մեդիա, մարքեթինգ ու բիզնես մասնագետների, ինչպես նաև արվեստի ոլորտում գործունեություն ծավալողների համար։ Վարպետության դասեր, բրեյնսթորմինգ, հաջողված նախագծերի ներկայացում և փորձագետների խորհրդատվություններ․ այն ամենն, ինչ անհրաժեշտ է քաղաքացիական նախաձեռնություններն առավել արդյունավետ ու հասարակության համար գրավիչ դարձնելու համար։ Նախորդ տարվա համեմատ՝ մասնակիցների քանակն ավելացել է։
Թբիլիսիում անցկացվող CampCamp 2017-ին 100 ակտիվիստ էր մասնակցում։ Այս տարի մասնակիցների թիվը գերազանցում է 150-ը։ Ծրագիրը Հայաստանում անցկացնելու որոշումը ևս պատահական չէ։
«Հայաստանը հրաշալի ու դրական օրինակ է այն բանի, թե ինչպես կարճ ժամանակամիջոցում երկիրը կարող է փոխվել, ինչպես հասարակությունը կարող է միավորվել ու աշխատանքներ տանել ավելի լավ ապագա ունենալու համար։ Այս երկիրն այնքան մեծ ներուժ, էներգիա ու ստեղծարարություն ունի։ Մենք հույս ունենք, որ այդ ամենը կկարողանանք փոխանցել նաև այլ երկրներին»,- ընդգծում է Ռոստիսլավ Վալվոդան։
Ղազախստանից ժամանած ռեժիսոր Կատերինա Սուվորովան «Ժան Ռուշ» միջազգային կինոփառատոնի դափնեկիր է։ Այստեղ է՝ պատմելու իր նոր ֆիլմի մասին։ Ասում է՝ տարակուսել էր, թե ինչու է CampCamp2018-ը հենց այստեղ անցկացվում։ Տեղեկանալուց հետո Հայաստանի նկատմամբ հպարտությամբ է լցվել։ «Այն, ինչ այստեղ՝ Հայաստանում տեղի ունեցավ, մեծ ազդեցություն թողեց նաև շրջապատի մարդկանց վրա։ Այդ էներգիան նույնիսկ հիմա է հնարավոր զգալ։ Այսօր մեր հասարակությունը քաղաքական կոմայի մեջ է, և այն, ինչ եղավ, ցույց է տալիս, որ Հայաստանում քաղաքացիներն ակտիվ են, ունեն սեփական տեսակետ, ունակ են կառավարել երկրի քաղաքական իրավիճակը։ Ինձ համար սա շատ հուզիչ է, քանի որ շատ երկրներում փոփոխություններ տեսնելու համար մեկ քայլ անգամ չի արվում»,- նշում է Կատերինան։ Նոյեմբերի 8-ին մեկնարկած CampCamp2018-ը մոտիվացվելու և քաղաքացիական հասարակության ակտիվ անդամ դառնալու հնարավորություն է։ Տարածաշրջանի ամենակրեատիվ ու ակտիվ անհատները Հայաստանում ևս 3 օր կմնան։
Մանրամասները՝ տեսանյութում:
Նելլի Մելքոնյան
