18.05.2026 | 17:16
«Ռադդ քաշի՛, համբալի մեկը»․ թեժ լեզվակռիվ Փաշինյանի և Արթուր Օսիպյանի միջև․ ՏԵՍԱՆՅՈՒԹ
Ադամանդների գործով Կճոյանի նկատմամբ հարուցված քրեական հետապնդումը ինչո՞ւ դադարեցվեց․ ՔԿ-ից մանրամասնում են
Քաղաքականություն
13.12.2025 | 13:40
Factor TV-ի հարցմանն ի պատասխան Քննչական կոմիտեից հայտնել են՝ ինչ հիմքով է դադարեցվել Արարատյան Հայրապետական թեմի առաջնորդական փոխանորդ Նավասարդ արքեպիսկոպոս Կճոյանի նկատմամբ հարուցված քրեական հետապնդումը։
Հիշեցնենք՝ նրա անունը, նախկին վարչապետ Տիգրան Սարգսյանի և գործարար Աշոտ Սուքիասյանի անունների հետ միասին, հայտնվել էր Կիպրոսում գրանցված օֆշորային ընկերության փաստաթղթերում։ Կճոյանին մեղադրանք էր առաջադրվել առանձնապես խոշոր չափով խարդախության և փողերի լվացման համար։ Ըստ քննության նյութերի` գործարար Աշոտ Սուքիասյանը, նախնական համաձայնության գալով Նավասարդ արքեպիսկոպոս Կճոյանի հետ, գործարար Փայլակ Հայրապետյանին ներկայացրել էր Աֆրիկայում իբր իրենց պատկանող ադամանդի հանքավայրերում 12 միլիոն ԱՄՆ դոլարի ներդրում կատարելու առաջարկ։ Գործարարն ունեզրկվել է, իսկ նրանից ստացված եկամուտներն օրինականացնելու համար օգտագործվել է հանցավոր խմբի անդամների կողմից նախապես՝ 2010թ. գարնանը, օֆշորային գոտում հիմնադրված ընկերությունը, որի 33 տոկոս բաժնեմասը պատկանել է եկեղեցու հիշյալ սպասավորին։
Կճոյանի նկատմամբ հետապնդումը դադարեցվել էր դեռևս 2021-ի դեկտեմբերի 17-ին։ Բացի այդ, ՔԿ-ից մեզ հայտնեցին, որ նշված քրեական վարույթով ներկայումս որևէ անձի նկատմամբ հանրային քրեական հետապնդում չի իրականացվում։ Առաջնորդական փոխանորդի նկատմամբ հետապնդումը դադարեցվել է՝ նրա արարքում հանցակազմի բացակայության հիմքով։
2020-ին նշված քրեական գործի վերաբերյալ Ազգային անվտանգության հաղորդագրության մեջ նշված էր, որ «հանցագործությունները բացահայտվելուց հետո, 2013 թվականի ընթացքում նշված հոգևորականը, օգնելու խոստումներ տալով, համոզել է հետախուզման մեջ գտնվող հանցակցին (Աշոտ Սուքիասյանին-խմբ․) ստանձնել ամբողջ պատասխանատվությունը և հանցագործությանն իր մասնակից լինելու ապացույցները կեղծելուն կամ ոչնչացնելուն ուղղված գործողություններ ձեռնարկել»: Այս մասով նույնիսկ ձայնագրություն կա հրապարակված։
Քննչական կոմիտեից Factor TV-ին հայտնեցին, որ այս մասով հայցվող տեղեկատվությանը չի կարող տրամադրվել՝ հրապարակման ոչ ենթակա նախնական քննության տվյալներ պարունակելու պատճառաբանությամբ։
Ավելի վաղ Factor TV-ն հայտնել է նաև, որ Կճոյանին այս ամռանը նոր մեղադրանք է ներկայացվել։ Քրեական վարույթը նախաձեռնվել է 2024-ի աշնանը, սակայն Կճոյանին մեղադրանք է ներկայացվել մոտ 10 ամիս անց՝ այն ժամանակահատվածում, երբ վարչապետ Նիկոլ Փաշինյանը սկսել էր եկեղեցու վերնախավի դեմ արշավը։ Ըստ վարույթն իրականացնող մարմնի՝ Կճոյանը Արարատյան հայրապետական թեմից գումար է կանխիկացրել, ապա, ամիսներ անց տուն գնել։
Եվգենյա Համբարձումյան
