05.10.2026 | 18:00
«Մեծամորի ատոմակայանը պետք է փակվի»․ Բաքուն Երևանում կայանալիք COP17-ին ընդառաջ արշավ է սկսել
Կճոյանին ամռանը նոր մեղադրանք է ներկայացվել, թեև վարույթը հարուցվել էր 2024-ի աշնանը
Հասարակություն
11.12.2025 | 15:06
Արարատյան հայրապետական թեմի առաջնորդական փոխանորդ Նավասարդ արքեպիսկսպոս Կճոյանին, որն օրերս ի թիվս այլ բարձրաստիճան հոգևորականների հանդիպել էր վարչապետ Նիկոլ Փաշինյանի հետ և միացել կաթողիկոսի հեռացումը պահանջող հայտարարությանը, այս ամռանը մեղադրանք է ներկայացվել։ Այս մասին հայտնում են իրավապահ համակարգում Factor TV-ի աղբյուրները։
Քրեական վարույթը նախաձեռնվել է 2024-ի աշնանը, սակայն Կճոյանին մեղադրանք է ներկայացվել մոտ 10 ամիս անց՝ այն ժամանակահատվածում, երբ վարչապետ Նիկոլ Փաշինյանը սկսել էր եկեղեցու վերնախավի դեմ արշավը։ Ըստ վարույթն իրականացնող մարմնի՝ Կճոյանը Արարատյան հայրապետական թեմից գումար է կանխիկացրել, ապա, ամիսներ անց տուն գնել։
Թե մեղադրանքի վերաբերյալ ինչ դիրքորոշում է հայտնել արքեպիսկոպոսը, մեզ հայտնի չէ։ Սակայն հայտնի է, որ քննության առարկա գույքը գտնվում է Երևանի Սուրբ Աբգար թագավորի փողոցում։ Հայտնի է նաև, որ Կճոյանը համապատասխան փաստաթղթեր է ներկայացրել, այն մասին, որ թեմից կանխիկացված գումարը փոխանցվել է ծնողազուրկ երեխաների օգնության ֆոնդին։
Այս տունն, ի դեպ, անցել է նաև ապօրինի ծագում ունեցող գույքի բռնագանձման գործով, որով չի հիմնավորվել դրա ապօրինի լինելը։
Ավելի վաղ Factor. am-ը գրել էր, որ դեռևս 2012 թվականին Երևանի քաղաքապետարանն Արաբկիր վարչական շրջանում գտնվող տարածքը 49 տարով տրամադրել է Արարատյան Հայրապետական Թեմի առաջնորդական փոխանորդ Նավասարդ արքեպիսկոպոս Կճոյանին։ Կճոյանը պետք է այս հատվածում հանգստի գոտի կազմակերպեր։ Այժմ Գլխավոր դատախազությունը հողամասի կառուցապատման իրավունքի հարկադիր դադարեցման պահանջ է ներկայացրել դատարան։
Հիշեցնենք, որ ամռանից սկսած վարչապետ Նիկոլ Փաշինյանը գրեթե ամենօրյա ռեժիմով գրառումներ է անում Ամենայն Հայոց Կաթողիկոս Գարեգին Բ-ի մասին՝ նրան դիմելով ավազանի անունով և պահանջելով որ նա հեռանա։ Սրան զուգահեռ Քննչական կոմիտեն տարբեր վարույթների շրջանակներում բարձրաստիճան հոգևորականների ներգարվել է որպես մեղադրյալ։
Արաքս Մամուլյան
