Բաքուն դիտարկում է Հայաստանի հետ սահմանին երկաթուղային գիծը վերականգնելու հարցը՝ ի պատասխան «Թբիլիսիի սակագնային դեմարշի». ադրբեջանական աղբյուր

Ադրբեջանը սկսել է գնահատել այլընտրանքային լոգիստիկ առանցք զարգացնելու համար իր սեփական հնարավորությունները՝ ի պատասխան «Թբիլիսիի սակագնային դեմարշի»։ Այս մասին ասվում է ադրբեջանական իշխանական Minval Politika-ի հրապարակման մեջ, որն անդրադառնում է Վրաստանի տարածքով Ադրբեջանից Հայաստան տարանցումներին ու դրա համար սակագների սահմանմանը։

Նշվում է, որ Խորհրդային տարիներին գոյություն ուներ երկաթուղի, որը կապում էր Բաքուն Ղազախի հետ, այնուհետև շարունակվում դեպի Իջևան: Բաքուն ներկայում դիտարկում է այս հատվածի վերականգնման հնարավորությունը՝ Ղազախից մինչև Հայաստանի հետ ենթադրյալ սահմանը։

Minval Politika-ի աղբյուրների տեղեկություններով՝ նախնական գնահատումն արդեն սկսվել է. ուսումնասիրվում են այն հատվածի հնարավոր վերականգնման տեխնիկական պարամետրերը, ծախսերը և ժամանակացույցը, որը թույլ կտա տարանցիկ երթևեկության մի մասը տեղափոխել Վրաստանից։ Այնուհետև բեռները կարող են սահմանը հատել ավտոմոբիլային փոխադրմամբ և ավելի խորը շարժվել դեպի Հայաստան, ինչը ժամանակակից լոգիստիկայի տեսանկյունից լիովին կենսունակ լուծում է։

Միևնույն ժամանակ, ուսումնասիրվում է լիարժեք ավտոճանապարհային երթուղիների տարբերակը։ Ըստ հրապարակման՝ երթուղին դեռևս վերջնականապես չի որոշվել. քննարկվում են այլընտրանքային միջանցքները և դրանց տնտեսական կենսունակությունը, բայց այն փաստը, որ նման քննարկումներ են տեղի ունենում, խոսում է գլխավորի մասին. Ադրբեջանը դադարել է Վրաստանի տարածքով տարանցումը դիտարկել որպես միակ կամ անխուսափելի ուղի։

Ըստ լրատվամիջոցի՝ այսօր Թբիլիսին կանգնած է պարզ ընտրության առաջ՝ կա՛մ ինտեգրվել համագործակցության նոր տարածաշրջանային մոդելին, կա՛մ հետևել, թե ինչպես են զարգանում երթուղիները, որոնցում իր ներկայությունն այլևս անհրաժեշտ չէ։

Ավելի վաղ հաղորդվել էր, որ դեկտեմբերի 5-ին Վրաստանի կառավարությունը գործընկեր երկրներից ստացել է խնդրանք՝ Վրաստանի տարածքով Ադրբեջանից Հայաստան վառելիքի միանվագ տարանցում իրականացնելու վերաբերյալ։ Հայկական կողմը հաստատել էր վրաց գործընկերների հետ քննարկումները։

Թարգմանությունը՝ Էմմա Չոբանյանի