27.10.2026 | 00:08
Վարդան Մինասյանն աշխատանքի է անցել Լիբանանում
Բեյրութում հյուրանոցի վրա հարվածի հետևանքով 4 մարդ է զոհվել․ Իսրայելը հայտարարում է, որ թիրախը իրանցի հրամանատարներն էին
Քաղաքականություն
08.03.2026 | 12:12
4 մարդ զոհվել է, ևս տասը վիրավորվել են Բեյրութի կենտրոնում գտնվող «Ռամադա» հյուրանոցի վրա Իսրայելի հարվածի հետևանքով, հայտնում է Reuters գործակալությունը՝ հղում անելով Լիբանանի առողջապահության նախարարությանը։
Իսրայելի զինվորականները մարտի 8-ի վաղ առավոտյան հարված են հասցրել հյուրանոցի սենյակներից մեկին։ Գործակալությունը նշում է, որ սա առաջին իսրայելական հարվածն է Բեյրութի կենտրոնին այն պահից ի վեր, երբ անցյալ շաբաթ վերսկսվել են մարտական գործողությունները Իսրայելի և Հեզբոլլահի միջև։ Իսրայելի պաշտպանության ուժերը հայտնել է, որ իրականացրել է ճշգրիտ հարված Բեյրութում գործող «Քուդս» ուժերի լիբանանյան կորպուսի առանցքային հրամանատարների դեմ։
«Քուդս» ուժերը հանդիսանում են Իսլամական հեղափոխության պահապանների կորպուսի հատուկ ստորաբաժանումը։ Ըստ Իսրայելի հայտարարության՝ նրանք զբաղվում էին Իսրայելի դեմ հարձակումների պլանավորմամբ։ Իսրայելական զինվորականների պնդմամբ՝ հարվածից առաջ ձեռնարկվել են միջոցներ «քաղաքացիական բնակչությանը հասցվող վնասը նվազագույնի հասցնելու համար»։
Լիբանանը ներքաշվել է Մերձավոր Արևելքում սկսված նոր պատերազմի մեջ այն բանից հետո, երբ լիբանանյան «Հըզբոլլահ» խմբավորումը սկսել է հարձակումներ իրականացնել Իսրայելի դեմ։ Թեհրանի աջակցությունը վայելող այդ խմբավորումը այսպես է պատասխանել Իրանի դեմ ԱՄՆ-ի և Իսրայելի հասցրած հարվածներին։ Ի պատասխան՝ Իսրայելը սկսել է զանգվածային հարվածներ հասցնել Լիբանանի հարավային և արևելյան շրջաններին, ինչպես նաև Բեյրութի մերձակայքին։
Իշխանությունների տվյալներով՝ Լիբանանում հրետակոծությունների հետևանքով զոհվել է մոտ 300 մարդ, իսկ հարյուր հազարավոր լիբանանցիներ ստիպված են եղել լքել իրենց տները։
