14.09.2026 | 14:48
Անկարան հայտնել է, որ Թուրքիայից Հայաստան արտահանումը հունվար-օգոստոսին կազմել է 1 մլն 336 հազար դոլար
Թեհրանի վրա «նավթային անձրև» է տեղում․ Իսրայելը հարվածներ է հասցրել Իրանի նավթային պահեստներին․ CNN
Քաղաքականություն
08.03.2026 | 12:32
Իսրայելի պաշտպանության բանակը հաստատել է, որ մարտի 7-ի երեկոյան հարվածներ է հասցրել Թեհրանում գտնվող մի քանի վառելիքի պահեստների, հաղորդում է The Times of Israel-ը։
«Իրանի ահաբեկչական ռեժիմի ռազմական ուժերը ուղղակիորեն և հաճախ օգտագործում են այդ վառելիքային պահեստները՝ ռազմական ենթակառուցվածքների աշխատանքը ապահովելու համար։ Դրանց միջոցով իրանական ռեժիմը վառելիք է բաշխում տարբեր սպառողների, այդ թվում՝ Իրանում գործող ռազմական կառույցներին»,- ասվում է բանակի հայտարարության մեջ։
Մարտի 8-ի առավոտյան CNN-ի թղթակից Ֆրեդերիկ Փլեյթգենը Թեհրանից հայտնել է, որ նավթային պահեստների վրա հարվածներից հետո քաղաքի վրա կուտակվել են խիտ սև ամպեր և տեղում է «նավթային անձրև»։
«Անձրևը, այսինքն՝ անձրևաջուրը, իրականում սև է՝ ըստ երևույթին ներծծված նավթով»,- ասել է լրագրողը։
Իրանական Mehr News Agency գործակալությունը հաղորդագրություն է հրապարակել Իրանի մայրաքաղաքում թունավոր տեղումների մասին․ «Նավթային պահեստներում պայթյունները մթնոլորտ են արտանետում մեծ քանակությամբ թունավոր ածխաջրածնային միացություններ, ինչպես նաև ծծմբի և ազոտի օքսիդներ, որոնք տեղումների դեպքում կարող են առաջացնել շատ վտանգավոր՝ ուժեղ թթվային հատկություններով անձրև»։
The New York Times-ը հաստատել է սոցիալական ցանցերում տարածված տեսանյութերի իսկությունը, որտեղ երևում են հրդեհ և ծխի սյուներ Թեհրանի գլխավոր նավթավերամշակման գործարանի տարածքում՝ Շահր-է Ռեյ շրջանում։ Իրանի նավթի նախարարությունը հայտնել է նաև, որ հրետակոծության է ենթարկվել նավթաբազա Քարաջ քաղաքում, որը գտնվում է Թեհրանից արևմուտք։
Մարտի 5-ին Իսրայելի բանակի գլխավոր շտաբի պետ, գեներալ-լեյտենանտ Էյալ Զամիրը հայտարարել էր, որ Իսրայելը անցնում է Իրանի դեմ ռազմական գործողության հաջորդ փուլին, սակայն չէր հստակեցրել, թե ինչ քայլեր են ներառվելու այդ փուլում։ Ավելի ուշ CNN-ի աղբյուրը Իսրայելում հայտնել է, որ նավթային պահեստների վրա հարվածները հենց այդ պատերազմի նոր փուլի շրջանակում են իրականացվում։
Տեսանյութերը՝ այստեղ։
