Դոնալդ Թրամփի կարծիքով՝ Մինաբ քաղաքում աղջիկների դպրոցի շրջանում տեղի ունեցած հարվածի պատասխանատվությունը կրում է Թեհրանը

ԱՄՆ նախագահ Դոնալդ Թրամփի կարծիքով, Իրանի հարավում գտնվող Մինաբ քաղաքում աղջիկների դպրոցի շրջանում տեղի ունեցած հարվածի պատասխանատվությունը, որի հետևանքով զոհվել է ավելի քան 170 մարդ, կրում է Թեհրանը։ Այդ մասին նա հայտարարել է լրագրողների հետ զրույցում նախագահական Air Force One ինքնաթիռում կիրակի գիշերը՝ մարտի 8-ին, հայտնում է DW-ն։

Հարցին՝ արդյոք ԱՄՆ-ը պատասխանատվություն ունի տեղի ունեցածի համար, Թրամփը նշել է․ «Ոչ, իմ կարծիքով, հաշվի առնելով այն, ինչ տեսել եմ, դա իրականացրել է Իրանը»։

Միևնույն ժամանակ Պենտագոնի ղեկավար Փիթ Հեգսեթը, որը ուղեկցում էր Թրամփին այդ ուղևորության ընթացքում, ուղիղ կերպով չի հաստատել այդ գնահատականը։ Նրա խոսքով՝ Միացյալ Նահանգները ներկայումս «քննում է» միջադեպը։

Դպրոցը փլուզվել է փետրվարի 28-ի առավոտյան իրականացված հրթիռային հարվածի հետևանքով։ Զոհվել է առնվազն 175 մարդ, այդ թվում բազմաթիվ երեխաներ։ Ինչպես հայտարարել է Մինաբ շրջանի դատախազը, զոհվածների մեծ մասը դպրոցի աշակերտուհիներ էին։ Մարտի 5-ին The New York Times-ը, վերլուծելով Planet Labs ընկերության արբանյակային նկարները, հայտնել է, որ դպրոցի շենքը լրջորեն վնասվել է բարձր ճշգրտության հարվածի հետևանքով, որը իրականացվել է միաժամանակ մոտակայքում գտնվող՝ Իրանի Իսլամական հեղափոխության պահապանների կորպուսի կողմից վերահսկվող ռազմածովային բազայի վրա հարձակումների հետ։

Պաշտոնական հայտարարությունները, ըստ որոնց ԱՄՆ ուժերը հարվածներ են հասցրել Օրմուզի նեղուցի մոտ գտնվող ռազմածովային օբյեկտներին, որտեղ տեղակայված է այդ կորպուսի բազան, թույլ են տալիս ենթադրել, որ այդ հարվածի հետևում կարող է կանգնած լինել հենց այդ երկիրը, նշվում էր հրապարակման մեջ։

Հիշեցնենք՝ փետրվարի 28-ին ԱՄՆ-ը և Իսրայելը սկսեցին հարվածներ հասցնել Իրանի տարածքին։ Իսլամական Հանրապետությունը պատասխանեց դրոններով և հրթիռներով հարձակումներով Իսրայելի և Մերձավոր Արևելքի այն երկրների վրա, որոնք տարածաշրջանում Վաշինգտոնի դաշնակիցներն են։ Թեհրանը հայտարարում է, որ իրանական հարվածների թիրախները այդ երկրներում գտնվող ամերիկյան ռազմական բազաներն են։ ԱՄՆ-ի և Իսրայելի ռազմական գործողության արդյունքում սպանվել է Իրանի գերագույն առաջնորդ Ալի Խամենեին, ինչպես նաև Իսլամական Հանրապետության մի շարք բարձրաստիճան պաշտոնյաներ։

Մարտի 8-ի գիշերը Air Force One ինքնաթիռում լրագրողների հետ զրույցում Թրամփը հայտարարել է, որ հետաքրքրված չէ Թեհրանի հետ բանակցություններով և ենթադրել է, որ Իրանում պատերազմը կարող է ավարտվել այն ժամանակ, երբ Իսլամական Հանրապետությունը այլևս չունենա գործող բանակ կամ որևէ պետական առաջնորդ։ Նրա խոսքով՝ Իրանի վրա ավիահարվածները կարող են բանակցությունները «ավելորդ» դարձնել, եթե երկրի հնարավոր առաջնորդներն ու բանակը ոչնչացվեն։

«Կարծում եմ՝ ինչ-որ պահի պարզապես չի մնա մեկը, ով կարող է ասել. «Մենք հանձնվում ենք»»,- Թրամփի խոսքերը մեջբերում է Reuters գործակալությունը։