02.04.2026 | 12:34
«Թրամփի ուղու» համաձայնագիրը խախտել է 1828թ-ից գործող հավասարակշռությունը Հարավային Կովկասում. Օվերչուկ
Որքան կտևի Կասկադ համալիրի վերակառուցումը. քաղաքապետարանի խորհրդականը մանրամասներ հայտնեց․ ՏԵՍԱՆՅՈՒԹ
Տնտեսություն
08.12.2025 | 10:40
«Կասկադ համալիրի անավարտ հատվածի վերակառուցման հետ կապված գործընթացներում մենք ունեցանք մի քայլ առաջընթաց, որը վկայում է շատ կարևոր և գործնական փուլի մասին»,- Երևանի քաղաքապետարանի գործակարգավարական խորհրդակցության ժամանակ ասաց Երևանի քաղաքապետի խորհրդական Սոնա Թևանյանը։
«Ներդրող գործընկերոջ հետ ստորագրեցինք Կասկադ համալիրի անավարտ հատվածի վերակառուցման՝ «Կասկադ» մշակութային հանգույց նախագծի իրականացմանն ուղղված պայմանագիրը, որի հիման վրա կկարգավորվեն կողմերի իրավահարաբերությունները, և որի շնորհիվ կիրականացվի մեր հետագա ամբողջ գործընթացը։ Հաջորդիվ նաև նախատեսվում է կնքել հարակից հատվածում գտնվող հողամասի առուվաճառքի պայմանագիրը, որը հանդիսանում է ծրագրի իրականացման այն կոմպոնենտը, որը հնարավորություն է տվել մրցույթի պայմաններին համապատասխան ներգրավել ներդրող ընկերությանը։ Եվ այս երկու պայմանագրերի տրամաբանությունը և կարգավորումները այնպիսին են, որ կառուցապատման աշխատանքները երկու հատվածներում՝ համայնքապատկան՝ հետագայում համայնքին հանձնվելիք կառույցի մասով, և հարակից հատվածում իրականացվող շինարարությունը պետք է տեղի ունենան զուգահեռ, միաժամանակյա կազմակերպման սկզբունքով, որպեսզի հնարավոր լինի ապահովել ամբողջ քաղաքաշինական պրոցեսի միասնականությունը և համաժամանակյա իրականացումը»,- ընդգծեց Թևանյանը։
Քաղաքապետի խորհրդականը նշեց, որ ծրագիրը ներառում է նաև հարակից հատվածում գտնվող համայնքային հողամասի բարեկարգում և այն որպես քաղաքային այգի ձևավորելու մտադրությունը։
«Ծրագրի իրականացման նախատեսվող ժամկետը շինարարության թույլտվության պահից սկսած 5 տարիների ընթացքն է, որի ամբողջ ժամանակահատվածում պետք է հնարավոր լինի ապահովել մշակութային հանգույցի ամբողջական կառուցումը և այն շահագործման ենթակա վիճակում համայնքին՝ ներդրողի կողմից որպես սեփականություն փոխանցելը»,- նշեց Սոնա Թևանյանը։
Հիշեցնենք, որ օրերս Երևանի քաղաքապետարանը հայտնեց՝ «Կասկադ» համալիրի անավարտ հատվածի վերակառուցման՝ «Կասկադ մշակութային հանգույց» նախագիծը կիրականացնի «Ջի Թի Բի դիվելոփմենթ» ՍՊԸ-ն։
Մանրամասները՝ տեսանյութում։
Արփի Հակոբյան
